Ráðuneytisstjóri utanríkisráðuneytisins kallaði fulltrúa rússneska sendiráðsins á Íslandi á sinn fund í morgun. Þar voru gerðar alvarlegar athugasemdir við framferði Rússlands. Þetta sagði Þorgerður Katrín Gunnarsdóttir utanríkisráðherra í hádegisfréttum Bylgjunnar.
Hún segir samstöðu Íslands með Þýskalandi hafa verið áréttaða í ljósi drónaatviks í Leipzig í Þýskalandi í síðasta mánuði. Fulltrúi Rússa hafi tekið á móti skilaboðunum. Ísland haldi áfram að styðja við Úkraínu og mótmæli grimmilegum stríðsrekstri Rússlands.
Þorgerður sat fund utanríkisráðherra Evrópusambandsríkja á Írlandi í gær. Í samtali við fréttastofu eftir fundinn sagði hún tilraun Rússa vera hryðjuverk.
„Það var nefnt á fundinum að það á bara að kalla þessar ógnir því sem þær heita, sem er bara hryðjuverk.“
Þýsk stjórnvöld sökuðu Rússa á þriðjudaginn um að hafa flogið dróna með sprengiefni inn á flugvöll í Leipzig. Rússlandsforseti segir þýsk stjórnvöld hafa komið fyrir sönnunargögnum til að saka Rússa um árásina.
