Utanríkis- og dómsmálaráðherrar ellefu Evrópuríkja innan Schengen hafa undirritað bréf þar sem framkvæmdastjórn Evrópusambandsins er hvött til að herða og samræma reglur um útgáfu vegabréfsáritana til rússneskra ríkisborgara. Utanríkisráðherra og dómsmálaráðherra Íslands eru þeirra á meðal.
Þetta staðfestir utanríkisráðuneytið við fréttastofu.
Bréfið undirrituðu utanríkisráðherrar og dómsmálaráðherrar Íslands, Norðurlandanna, Eystrasaltsríkjanna, Tékklands, Póllands og Hollands og afhentu Kaju Kallas, utanríkismálastjóra ESB, fyrir fund utanríkisráðherra og dómsmálaráðherra ríkja Evrópusambandsins, og Schengen-ríkja utan ESB, í Lúxemborg í dag.
„Í bréfinu er framkvæmdastjórn Evrópusambandsins hvött til að herða og samræma framkvæmd gildandi reglna um útgáfu Schengen-vegabréfsáritana til rússneskra ríkisborgara, meðal annars með frekari takmörkunum á útgáfu áritana til endurtekinna ferða inn á Schengen (e. multiple entry visa) og auknu eftirliti með framkvæmd takmarkandi reglna aðildarríkjanna um útgáfu vegabréfsáritana til rússneskra ríkisborgara,“ segir í skriflegu svari utanríkisráðuneytisins til fréttastofu.
Í bréfinu er framkvæmdastjórnin jafnframt hvött til að skoða mögulegar aðgerðir til að koma í veg fyrir að einstaklingar sem hafa tekið þátt í stríðsrekstri fyrir hönd Rússlands geti ferðast um Schengen-svæðið.
„Rétt er að hafa í huga að takmarkandi áritanastefna gagnvart rússneskum ríkisborgurum hefur verið við lýði frá árinu 2022. Frá þeim tíma hafa umsóknir sætt aukinni skoðun og strangara mati og á síðari árum hafa reglurnar verið hertar enn frekar, meðal annars hvað varðar útgáfu áritana til endurtekinna innferða.“
Fréttin hefur verið uppfærð.
