Tap Icelandair eftir skatta á fyrsta ársfjórðungi 2026 nam alls 5,6 milljörðum króna. Sé horft til sama ársfjórðungs á síðasta ári var tap þá 6,1 milljarður króna. Viðsnúningurinn er því um hálfur milljarður, en jafnan er algengt að flugfélög skili tapi á fyrsta ársfjórðungi þar sem sá tími er lágannatími í flugrekstri.
Tekjur flugfélagsins voru 42,9 milljarðar króna á tímabilinu sem er aukning um 21%.
Bogi Nils Bogason, forstjóri Icelandair, segir að um mettekjur sé að ræða hjá flugfélaginu. Flugframboð hafi verið aukið um 13%. Metsætanýting hafi verið í ársfjórðungnum og Icelandair hafi mælst eitt stundvísasta flugfélag Evrópu með 82% stundvísi.
„Snörp hækkun olíuverðs að undanförnu hafði ekki teljandi áhrif á afkomuna í fjórðungnum en við munum sjá meiri áhrif þessara hækkana frá og með öðrum ársfjórðungi,“ segir Bogi Nils í tilkynningu. Hann segir að vegna þessa sé óhjákvæmilegt að farmiðaverð og fargjöld hækki.
„Til að bregðast við þessari stöðu höfum við dregið flugframboð saman um rúmlega 2% frá miðjum apríl til loka júní. Þá eru hækkanir á farmiðaverði óhjákvæmilegar og fargjöld hafa verið hækkuð frá því að þessi þróun eldsneytisverðs hófst. Þetta hefur þó ekki haft mælanleg áhrif á eftirspurn eins og staðan er í dag.“
Bogi Nils segir mikilvægt að tryggja fyrirsjáanleika til lengri tíma í sem flestum rekstrarþáttum og vísar til kjarasamninga sem nú eru lausir. Tilkynnt var að kjaradeilu flugmanna og Icelandair hefði verið vísað til ríkissáttasemjara um helgina.
„Áherslurnar í samningaviðræðum við flugstéttirnar eru að félagið geti áfram boðið eftirsótt störf í flugrekstri á Íslandi með því að tryggja samkeppnishæfni félagsins, styðja við vöxt leiðakerfisins og flotans, ásamt því að auka rekstrarlegan sveigjanleika,“ segir Bogi Nils.
„Auk þess á félagið í samtali við íslensk stjórnvöld um mikilvægi þess að verja samkeppnishæfni Íslands þegar kemur að evrópsku regluverki, sérstaklega er varðar ETS-kerfið og önnur loftslagsgjöld.“
