Formlegar og óformlegar viðræður eru milli stjórnvalda, atvinnulífsins, og almenna vinnumarkaðarins um þá hættu sem nú vofir yfir að endurskoðunarákvæði kjarasamninga virkist í haust og að þá gæti verkalýðshreyfingin sagt samningum upp. Engar verðbólguspár gera ráð fyrir því að ársverðbólga verði undir 4,7 prósentum í ágúst en það er viðmiðið í kjarasamningum.
Vinnumarkaðsmál heyra undir Ragnar Þór Ingólfsson félags- og húsnæðismálaráðherra. Hann var formaður VR þegar kjarasamningar voru gerðir 2024 og segir að verkalýðshreyfingin hafi með samningunum svarað mjög háværu ákalli frá atvinnulífi og þáverandi stjórnvöldum um hófstillta samninga:
„Ábyrga samninga til þess að tala inn í lægri vexti og verðbólgu sem að hefur ekki gengið eftir að þá finnst mér fátt benda til þess að atvinnulífið hafi farið í þá vegferð sem hún skuldbatt sig til að fara,“ segir Ragnar Þór.
Vísar hann í afkomutölur fyrirtækja, verðlag og yfirstandandi athugun Samkeppniseftirlitsins á matvöruverði sem er hér næsthæst í Evrópu og 55 prósentum hærra en annars staðar að meðaltali í álfunni.
„Það er margt sem bendir til þess að fyrirtækin hafi ekki sýnt sömu ábyrgð og krafist var af verkalýðshreyfingunni. Nú hafa fyrirtækin stuttan tíma til stefnu og ég skora á þau að frysta verðlag í einhvern tíma, lækka jafnvel vöruverð.“
Ragnar Jón segist ekki geta talað fyrir sveitarfélögin sem hafa verið gagnrýnd fyrir gjaldskrárhækkanir en gerir ráð fyrir að verkalýðsfélögin tali við þau. Allir hljóti þó að vilja að samningar haldi út samningstímann. Hann er sannfærður um að ríkisstjórnin sé tilbúin.
„Ég er sannfærður um það að ríkisstjórnin er tilbúin til þess að fara í fjölmörg önnur verkefni sem að verkalýðshreyfingin hefur kallað eftir.“
Til dæmis húsnæðis- og leigumarkaðinn segir hann.
„Við þurfum að girða okkur í brók.“
