Ný lög um sjúkratryggingar taka gildi um næstu áramót. Þeir sem eru sjúkratryggðir hér á landi og ferðast til landa utan EES-svæðisins GRAFÍK njóta þess ekki lengur að vera tryggðir hjá Sjúkratryggingum Íslands frá og með 1. janúar.
Hvers vegna er verið að breyta þessum trygginum?
„Það var verið að breyta til samræmis við það sem er í öðrum löndum, ekki síst á Norðurlöndunum þar sem að þegnar eru ekki sjúkratryggðir ef þeir veikjast utan Evrópska efnahagssvæðsins, segir Alma Möller, heilbrigðisráðherra.
Óvíst hvort bætur fáist fyrir þá sem eru með undirliggjandi sjúkdóma
Tryggingaverndin veltur þá á þeirri ferðatryggingu sem hver og einn hefur. Þar geta þættir eins og aldur og heilsufar og undirliggjandi sjúkdómar eins og hjarta- og æðasjúkdómar haft veruleg áhrif á hvort bætur fáist.
„Já, við höfum nýverið fengið ábendingar um að fólk eigi jafnvel erfitt með að fá tryggingu ef það er með langvinna sjúkdóma. Þetta eru ábendingar sem bárust okkur nýlega þannig að við erum að taka þær til skoðunar,“ segir Alma.
Dæmi um reikninga upp á tugi milljóna króna
Kostnaður vegna veikinda og slysa getur hlaupið á milljónum króna. Dæmi eru um fólk sem hefur lagst í skyndingu inn á spítala, til að mynda í Bandaríkjunum, og þurft á stórum og áhættusömum brjóstholsaðgerðum að halda. Kostnaður við slík tilvik getur hlaupið á tugum milljóna króna.
„Jah, þetta tekst hjá öðrum löndum, að fólk geti tryggt sig. Þannig að kannski á markaðurinn bara eftir að aðlaga sig hér segir Alma.
Er þetta mikill sparnaður sem næst fram með þessu?
„Ég held að þetta sé eitthvað um 100 milljónir á ári.“
Margir eldri borgarar dvelja vikum og jafnvel mánuðum saman á Spáni. Íslenskar sjúkratryggingar gilda bara á ríkisspítölum þar í landi en ekki á einkareknum heilsugæslum og spítölum, sem eru mjög algengir á Spáni.
„Ég held að fólk eigi bara að kynna sér málin hjá Sjúkratryggingum og auðvitað fara í gegnum sínar tryggingar. Ekki síst kreditkortatryggingarnar,“ segir Alma.
