Formaður utanríkismálanefndar segir alvarlegt þegar gantast sé með fullveldi Íslands en að mikilvægt sé að stigmagna það ekki af hálfu Íslands. Hann segir trúnað gilda um fund utanríkimálanefndar þar sem nefndin var upplýst um símtal Donalds Trumps og Bjarna Benediktssonar.
Trump, þá nýendurkjörinn forseti Bandaríkjanna, hringdi í Bjarna, þáverandi forsætisráðherra, í nóvemberlok 2024, fáeinum dögum fyrir alþingiskosningar.
Símtalið var ekkert leyndarmál á sínum tíma en eins og fréttastofa greindi frá í gær var þess hvergi getið að Trump hefði í tvígang í samtalinu bryddað upp á því hvort Ísland ætti að verða 51. ríki Bandaríkjanna.
Varaformaður utanríkismálanefndar sagði í morgun að betra hefði verið ef nefndin hefði fengið að vita fyrr af símtalinu.
Tilefni til þess að taka því alvarlega
Í svari við sömu spurningu segir Pawel Bartoszek formaður nefndarinnar erfitt að segja til um það að svo stöddu. Hann segir ekki ólíklegt að málið verði rætt á næsta fundi. Hann geti lítið tjáð sig um það þar sem það sé bundið trúnaði.
„En hins vegar þá verður að hafa í huga að það kom fram þessi færsla hjá forseta Bandaríkjanna í vikunni þar sem er sýnt ákveðið landakort og Ísland þar litað í ákveðnum fánalitum. Við höfum komið á framfæri mótmælum vegna þess og ég tel nauðsynlegt að við stöndum eins og svolítið saman sem þjóð í því að það sé ekki gantast með okkar fullveldi.“
Spurður hvort það teikni upp alvarlega mynd þegar myndbirtingin sé sett í samhengi við ummælin í símtalinu sagði Pawel tilefni til þess að einhverju leyti.
Ég held að það sé alveg tilefni til þess að taka málið alvarlega að því leyti að mörg önnur lönd sem hafa verið á þessu landakorti og sem hafa fengið sambærileg ummæli hafa lent t.d. í viðskiptaþvingunum eða sambærilegu þannig að mér finnst alveg tilefni til að taka málið alvarlega en auðvitað ekki að stigmagna það af okkar hálfu.
