Einar Jóhannes, oddviti Miðflokksins í Kópavogi, ræðir gervigreind, spjaldtölvuvæðingu, djúpfalsanir og gagnsæi í Kópavogsbæ í Gervigreindarklúbbnum.
Í nýjum þætti af Gervigreindarklúbbnum með Stefáni Atla fer Einar yfir stöðu gervigreindar í stjórnmálum, sveitarfélögum og skólamálum og sparar ekki stóru orðin. Einar, sem hefur starfað í hugbúnaðargeiranum og meðal annars unnið með sjálfvirknivæðingu ferla, segir að stjórnvöld og sveitarfélög þurfi að hugsa betur áður en þau hlaupa af stað í gervigreindarverkefni.
„Ég held einmitt að allt of margir séu allt of fljótir að tileinka sér þetta,“ segir Einar í þættinum. „Mér finnst þetta vera svona dæmi um að menn eru bara að hlaupa til þess að fara að nota gervigreind. En þeir eru ekki með kannski hugmynd um hvað er hægt að nota hana í.“
Hann segist sérstaklega gagnrýninn á spjallmenni sem séu sett upp í þjónustu án þess að hjálpa fólki í raun.
„Ég hef ekki ennþá hitt eitthvað þannig spjallmenni sem var hjálplegt. Maður er alltaf bara að tala við manneskju.“
Segist hafa séð marga með ChatGPT opið í þingsal
Einar kom inn sem varaþingmaður á Alþingi og segir upplifunina hafa verið athyglisverða ekki síst vegna þess hversu sýnileg gervigreindin var orðin í stjórnmálunum.
„Ég fór inn sem varaþingmaður á Alþingi okkar Íslendinga og það var ótrúlegt að sjá hversu margir voru með ChatGPT opið á tölvunni sinni inni í þingsal,“ segir Einar. „Mér fannst ég bara, nei, nei, nei. Þetta er rosalegt.“
Hann segir stærstu siðferðislegu hættuna felast í því að stjórnmálamenn og aðrir fari að nota ChatGPT sem heimild, eða láti tæknina vinna fyrir sig án nægrar yfirferðar.
„Ég held að siðferðislega hættan sé sú að einstaklingar fari að nota ChatGPT sem heimild.“
Harðorður um spjaldtölvuvæðingu í Kópavogi
Í þættinum ræðir Einar einnig spjaldtölvuvæðingu grunnskóla í Kópavogi og segir hana gott dæmi um að kerfið hafi tileinkað sér tækni of snemma.
„Spjaldtölvuvæðingin er mjög gott dæmi, talandi um að tileinka sér eitthvað of snemma,“ segir hann. „Ég myndi segja að spjaldtölvuvæðingin, það var farið svolítið fram úr sér þar.“
Einar segir börn í Kópavogi geta tekið spjaldtölvur heim frá 5. bekk og fullyrðir að nemendur komist fram hjá eldveggjum. „Ég er búinn að vera að tala við mikið af nemendum og þeir komast fram hjá öllum eldveggjum.“
Þá lætur hann eftirfarandi orð falla í þættinum:
„Það er verið að opna þarna það að börn í fimmta og sjötta bekk eru að byrja að horfa á klám í spjaldtölvum á kostnað Kópavogsbæjar.“
Hann segir þetta ekki vera einsdæmi. „Einhver myndi segja, þetta er bara einsdæmi. Það er ekki rétt.“
Vill meiri gagnsæi í Kópavogsbæ
Einar segist vilja sjá Kópavogsbæ verða mun gagnadrifnari og nefnir opið bókhald bæjarins sérstaklega. Hann segir að sem kjörinn fulltrúi muni hann óska eftir ítarlegri gögnum.
„Ef einhver hjá Kópavogsbæ er að hlusta, þá er ég að fara að skapa mikla vinnu hjá Kópavogsbæ,“ segir hann. „Af því það er rosa lítið um þessi gögn. Og eins og ég er að segja, ég vil vera gagnadrifinn.“
Hann segir jafnframt: „Nú segist Kópavogsbær vera með opið bókhald sem hann er ekki með.“
Í þættinum ræðir hann dæmi þar sem liður í bókhaldinu hafi verið merktur „einstaklingur 300“ og fjárhæðin sögð 170 milljónir króna. Einar segir síðar hafa komið í ljós að viðkomandi einstaklingur hafi í raun fengið 50 þúsund krónur fyrir námskeið, en að eftir standi spurningin um hvar fjármunirnir hafi endað.
„Ég bara, bíddu, en hvar er samt peningurinn? Já, hann er bara einhvers staðar í kerfinu, við getum ekki rakið hann.“
View this post on Instagram
A post shared by Gervigreindarklúbburinn – Hlaðvarp um gervigreind (@gervigreindarklubburinn)
Óttast djúpfalsanir í kosningum
Einar segir mikla hættu felast í djúpfölsunum og gervigreindar-falsfréttum, sérstaklega ef slíkt efni birtist rétt fyrir kosningar.
„Við erum núna komin á þann stað að það væri ekkert mál fyrir einhvern að djúpfalsa eitthvað og ef þú setur það fram nógu nálægt kosningum, þetta er nógu svona raunverulegt. Það væri svo erfitt fyrir þig að afsanna þetta.“
Hann telur þörf á skýrari reglum.
„Ég held að það sé ákveðin hætta varðandi þetta og þess vegna þarf líka bara að setja einhver lög, fleiri varðandi svona djúpfölsun og þetta. Við þurfum að setja einhvers konar stefnu varðandi gervigreindina og hvernig við notum hana, vegna þess að þetta er framtíðin og þetta er að breyta nútímanum, en þetta er rosalega hættulegt.“
Gervigreind taki ekki störf — heldur þeir sem tileinki sér hana
Þrátt fyrir gagnrýni sína á óvandaða notkun gervigreindar segist Einar ekki vera svartsýnn á áhrif tækninnar á vinnumarkaðinn.
„Ég held gervigreindin muni ekki taka störf af fólki, gervigreindin mun taka störf af fólkinu sem tileinkar sér ekki gervigreind.“
Hann segir tæknina geta skapað verðmæti og ný störf, en að mikilvægt sé að nota hana rétt.
Viðtalið birtist í Gervigreindarklúbbnum með Stefáni Atla, þar sem rætt er við fólk úr atvinnulífi, stjórnmálum, tækni og samfélagi um áhrif gervigreindar á Ísland.
Gervigreindarklúbburinn hefur nú þegar gefið út 37 þætti og fengið til sín fjölbreytta gesti úr atvinnulífi, stjórnmálum, lögfræði, listum, tæknigeiranum og nýsköpun. Meðal gesta sem hafa komið í þáttinn eru til dæmis Arnar Þór Jónsson, Stefán Þór Þorgeirsson, Einar Þorsteinsson, Ingibjörg Isaksen, Ingi Bauer, Jónas Sig, Maggi Mix og fleiri áhugaverðir einstaklingar sem hafa rætt áhrif gervigreindar frá ólíkum sjónarhornum.
