Opinbera orkufélagið, SEV, hefur óskað eftir skýrslu frá færeyskum sérfræðingi um möguleika á nýtingu á kjarnorku í Færeyjum. Greint er frá þessu á vef Sev.
Þar segir að eitt af hlutverkum byggingarnefndar SEV sé að tryggja matvælaöryggi og að nægileg raforka sé til í Færeyjum til að mæta framtíðarþörfum samfélagsins. Í því skyni hafi byggingarnefndin óskað eftir skýrslunni. Í byggingarnefndinni sitja þrír nefndarmenn auk stjórnar SEV.
Í skýrslunni er fjallað um kosti, galla og áskoranir við nýtingu á kjarnorku innan færeyska raforkukerfisins. Johan Paul Magnussen, doktor í kjarnorkuvísindum sem starfar hjá bresku kjarnorkustofnuninni, er að baki henni.
„Við höfum ekki farið ítarlega yfir drögin í nefndinni enn,“ er haft eftir Heðni Mortenssen, bæjarstjóra Þórshafnar. „En ef við ætlum að eiga sanngjarnt samtal um kjarnorku í Færeyjum er mikilvægt að hafa raunverulega þekkingu á málinu. Þetta er fyrsta skrefið.“
Vindorkuver helsti orkugjafinn
Á vef SEV er að finna yfirlit um hlutfallslega dreifingu raforkuframleiðslu í Færeyjum. Upplýsingarnar eru í rauntíma og uppfærðar reglulega, oft á dag.
Vindorkuver eru stærsti orkugjafinn í Færeyjum. Um þriðjungur raforku í landinu er framleiddur með vindmyllum, 65,9%. Næst á eftir er vatnsorka, 20,8%. Í þriðja sæti er orka sem er framleidd með því að brenna eldsneyti, 11,5%. Sólarorka og orka frá gasi nema tæpum tveimur prósentum samtals.
