PISA-könnunin 2025 og menntakerfið voru til umræðu í Vikulokunum fyrir hádegi. Niðurstöður PISA-könnunarinnar voru kynntar á þriðjudag. Frammistaða íslenskra grunnskólabarna hefur aldrei mælst eins slæm.
Menntakerfið megi styðja betur við stráka
Halla Stella Sveinbjörnsdóttir sálfræðinemi gerir athugasemdir við framkvæmd könnunarinnar.
„Mér finnst henni vera svolítið bara hent í okkur unga fólkið, sem sýnir kannski taktinn í samfélaginu í dag. Við erum í þvílíkum hraða í öllu og mættum alveg hægja á okkur. Það er svo persónubundið hjá nemendum hvernig þeir taka í svona aðstæður,“ segir hún.
Undirbúningurinn sé ekki nægur.
„Það er ekkert þægilegt að fá svona könnun á sig og mér finnst mega fara aðeins mýkra í þessa könnun. Það hefur náttúrlega áhrif á þessar niðurstöður. Ef við rýnum aðeins í tölurnar þá sést líka að hlutföllin eru mun lægri hjá strákum. Þeir eru ekki alveg að ná þessum grunnhæfniviðmiðum. Mér finnst menntakerfið mega styðja betur við strákana.“
Erfitt að taka prófið
Ómar Örn Magnússon, aðstoðarskólastjóri Hagaskóla, segir það að taka prófið reynast nemendum erfitt.
„Þetta er alveg fjögurra klukkutíma seta með fjórum hálftíma próflotum og síðan eru svona bakgrunnskannanir inni á milli og ýmislegt inni í þessu. Sú umræða kemur alltaf upp og við höfum verið að velta því fyrir okkur hvort okkar nemendur taki þessum prófum eitthvað síður alvarlega en aðrir, ég held að sú umræða skili okkur litlu,“ segir hann.
Það geti vel verið að staðan sé sú sama alls staðar.
„Okkur vantar meiri verkfæri“
Inga Sæland, barna- og menntamálaráðherra, kynnti niðurstöðurnar á þriðjudag. Ómar Örn segir ráðherrann hafa verið með góða punkta þegar hún tók saman hvað þurfi að gera til að bæta stöðuna.
„Svo komst ég aðeins í að lesa skýrsluna, PISA heildarskýrsluna, og það var svolítið skemmtilegt að þessir punktar sem Inga fór í eru nákvæmur samhljómur þeirra atriða sem OECD bendir á að menntakerfi sem þurfi að bæta sig ættu að gera. Það er að einfalda, það er að skýra, það er að vera með meiri fókus á atriðin sem skipta máli,“ segir Ómar Örn.
Þá hafi ráðherra einnig komið inn á mikilvægi námsefnisgerðar.
Sigrún Jóna Grettisdóttir, kennari í Árbæjarskóla, segir ótrúlega mikinn tíma fara í að búa til námsefni.
„Okkur vantar meiri verkfæri, okkur vantar námsefni. Okkur vantar sérstaklega námsefni varðandi ÍSAT-nemendurna okkar, sem eru semsagt með íslensku sem annað tungumál. Þetta verður langhlaup en ég leyfi mér að vera bjartsýn á það að allir leggist á árarnar saman og foreldrar komi með okkur í lið,“ segir Sigrún Jóna.
Það telji sig allir vita hvað gengur á innan veggja skólanna.
„En skólakerfið hefur breyst svo mikið. Áskorunum okkar hefur fjölgað. Nemendahóparnir eru orðnir svo fjölbreyttir þannig að áskorunum okkar, fólksins sem vinnur þarna, hefur fjölgað gríðarlega.“
