Mikið hefur gustað um SÁÁ síðustu vikur. Á sjöunda tug starfsmanna meðferðarsviðs samtakanna lýsti í gær yfir vantrausti á formann og stjórn SÁÁ. Þrír lykilstjórnendur hafa horfið á braut síðasta mánuðinn vegna ágreinings um afskipti stjórnar af faglegu starfi. Starfsfólk upplifir óvissu og fækka hefur þurft innlögnum á Vog vegna ástandsins.
„Mér finnst þetta mjög alvarleg staða og ég hef af henni áhyggjur,“ segir Alma Möller heilbrigðisráðherra.
„Mér þykir þetta leitt því við vorum komin með mjög góðan langtímasamning við SÁÁ og mér fannst allt vera á lygnum sjó. Þannig að ég er leið yfir þeirri stöðu sem upp er komin og þarna er auðvitað gríðarleg fagleg þekking sem gæti horfið á braut.“
Tilbúnar að koma aftur skapist vinnufriður
Heimildir fréttastofu herma að bæði Ragnheiður Hulda Friðriksdóttir forstjóri og Valgerður Rúnarsdóttir framkvæmdastjóri lækninga, sem hafa tilkynnt um starfslok, séu tilbúnar til að snúa aftur til starfa skapist vinnufriður.
Sjúkratrygginga og embætti landlæknis sinni eftirliti
Anna Hildur Guðmundsdóttir, formaður SÁÁ, hefur hafnað því að stjórnin skipti sér af faglegu heilbrigðisstarfi en segir að henni beri að hafa eftirlit með því.
„Það er embætti landlæknis sem fer með eftirlit með heilbrigðisþjónustu og síðan eru það auðvitað Sjúkratryggingar sem fylgjast með því að meðferðin sé í takt við þann samning sem gerður var.“
Þarf hugsanlega að skilja betur á milli faglegs starfs og félagasamtaka
Árið 2020 kom svipuð staða upp innan SÁÁ, með uppsögnum og vantrausti á félagsstjórn samtakanna. Það endaði með afsögn stjórnar. Fagstjóri Víkur, sem sagði einnig upp störfum á þeim tíma, sagði þá fullreynt að félagasamtök rækju heilbrigðisþjónustu og hefðu afskipti af henni.
Alma segir heilbrigðisráðherra ekki hafa heimild til að stíga með beinum hætti inn í rekstur heilbrigðisþjónustu hjá félagasamtökum á borð við SÁÁ.
„Það gildir einungis um opinberar stofnanir en auðvitað þarf þá að kveða á um í samningi hvernig svona stjórnsýslu er háttað og það má vel vera að við þurfum að skilja betur á milli faglegs starfs og félagasamtakanna.“
Mikilvægt sé að faglegt starf fái að blómstra innan SÁÁ án óþarfa afskipta.
Ráðherra hefur fundað með stjórninni
Alma segist fylgjast grannt með stöðu mála og hefur fundað með stjórn SÁÁ. „Ég hef auðvitað ekki heimildir til að beita mér af krafti en ég hef lagt ýmislegt til við stjórnina.“
Stjórn SÁÁ tilkynnti í gær að aðalstjórn félagsins yrði kölluð á aukafund eftir helgi vegna vantraustsyfirlýsingar starfsmanna.
