Atkvæðagreiðsla um verkfallsaðgerðir flugvirkja sem starfa hjá Icelandair hófst í gær.
Forstjóri Icelandair segir það alvarlegt að fagstéttir geti lokað landinu, með verkfallsaðgerðum, sé ekki gengið að kröfum þeirra í samningum.
Kjarasamningur Flugvirkjafélags Íslands og Icelandair rann úr gildi í árslok 2025. Samningurinn hafði verið í gildi frá ársbyrjun 2021. Í rúmt ár hafa árangurslausar samningaviðræður um nýjan samning staðið yfir.
Deilunni var vísað til ríkissáttasemjara í febrúar.
Kjarasamningar Icelandair við flugmenn og flugþjóna félagsins eru einnig lausir.
Segir vinnumarkaðsmódelið ekki sjálfbært
Bogi Nils Bogason, forstjóri Icelandair, segir að í samningaviðræðum við Flugvirkjafélag Íslands hafi verið boðnar hækkanir sem séu þær sömu á almennum markaði.
„En þeir koma fram með kröfur sem eru langt umfram það.“
Bogi segir íslenskt hagkerfi ekki þola svo miklar launahækkanir vegna hárra vaxta og verðbólgu. Hann vill að vinnumarkaðsmódelið verði endurskoðað, ekki sé hægt að ákveðnar fagstéttir geti boðað til áhrifamikils verkfalls sé ekki gengið að kröfum þeirra.
„Og ef ekki er gengið að því er hægt að fara í verkföll og næstum loka landinu. Og teikna upp grafalvarlega stöðu. Og það er ljóst að þetta módel er bara ekki sjálfbært.“
Flugvirkjar segjast hafa dregist aftur úr
Flugvirkjar hafa bent á að í síðasta kjarasamningi hafi þeir fallið frá kröfum sínum, meðal annars um afturvirkni og verðtryggingu til að taka tillit til erfiðrar stöðu flugfélagsins vegna covid-faraldursins.
Flugvirkjar hafi því dregist aftur úr í launakjörum miðað við samanburðarhópa.
Bogi er ósammála því. Hann segir flugvirkja hafa fengið hækkanir í takti við almenna markaðinn þau 5 ár sem fyrri kjarasamningur var í gildi.
En þeir tala sjálfir um að þeir hafi einmitt ekki fylgt þessum kjarabundnu hækkunum á almennum markaði?
„Já og það er ekki í samræmi við þau gögn sem við erum að horfa á. Alls ekki.“
Icelandair hefur ekki rætt við stjórnvöld um lög á verkfall
2010 setti Alþingi lög sem stöðvaði verkfall flugvirkja Icelandair sem hafði þá staðið í nokkrar klukkustundir.
2017 fóru flugvirkjar í verkfall sem hafði áhrif á um 20 þúsund flugfarþega.
Verkfallið stóð í alls 46 klukkustundir og lauk með undirritun kjarasamnings.
Bogi segir engar viðræður hafa átt sér stað við stjórnvöld um hugsanlega lagasetningu á verkföll flugvirkja, verði af þeim.
Atkvæðagreiðslu flugvirkja um verkfallsaðgerðir nú lýkur á mánudag.
Formaður félagsins vildi ekki veita fréttastofu viðtal í dag.
Bogi vonar að ekki komi til verkfalls, meðal annars vegna þeirra krefjandi aðstæðna sem flugfélagið glímir við vegna hækkandi eldsneytisverðs.
„Þannig þetta hefur bara veruleg neikvæð áhrif á okkar farþega og viðskiptavini, á íslenska ferðaþjónustu og hagkerfið í heild sinni.“
