Sjúkraflug jókst um ríflega 40% í júlí samanborið við í fyrra. Ef fram fer sem horfir verður flogið yfir þúsund sinnum á árinu í sjúkraflugi. Sérhæfing læknisþjónustu á höfuðborgarsvæðinu skýrir aukninguna að miklu leyti, segir Gunnar Rúnar Ólafsson, slökkviliðsstjóri á Akureyri.
Miðstöð sjúkraflugs á Íslandi er staðsett á Akureyri og er rekin í samvinnu Sjúkrahússins á Akureyri, Norlandair og Slökkviliðisins á Akureyri. Mikil fjölgun hefur orðið í sjúkraflugi og flutningi sjúklinga milli landshluta. Í júlí voru 121 sjúkraflug flogin.
„Það er klárt mál að við erum búin að sjá aukningu í sjúkraflugi statt og stöðugt síðustu ár,“ segir Gunnar Rúnar. „Til dæmis má nefna að 2016, eða fyrir 10 árum síðan, vorum við með 460 flug en ég reikna með því í sumar að við förum yfir 1000 fluga múrinn. Svo eru svona toppar eins og í sumar sem við sjáum, eins og í maí, júní, júlí og ágúst. Við erum búin að sjá talsvert mikla aukningu þar.“
Fjölgunin stafi af heilbrigðiskerfinu
Fjölgunin skýrist af ýmsum hlutum, líkt og fjölgun ferðamanna hérlendis. Stærsti þátturinn er að sérhæfing læknisþjónustu á landsbyggðinni er á undanhaldi.
„Fjölgunin á milli ára stafar af heilbrigðiskerfinu og tilfærslu á sérhæfðri þjónustu á landsbyggðinni sem er að minnka og færast yfir á stóru sjúkrahúsin, bæði Landspítalann og Sjúkrahúsið á Akureyri. Þegar þannig er í pottinn búið kallar það á sjúkraflug, meira. Það er svona helsta skýringin eða mitt mat af hverju þetta sé að aukast svona milli ára,“ segir Gunnar Rúnar.
Lífsspursmál að halda flugvöllum vítt og breytt um landið
Um 65% fluga enda í Reykjavík og um 20% á Akureyri. Í einstaka tilvikum er einnig flogið með sjúklinga erlendis. Norlandair sér um rekstur flugvéla og áhafna fyrir sjúkraflugið.
„Við fókusum á flugið, til hvenær sem er og þeir segja okkur hvert á að fljúga og við þurfum að koma öllum landsmönnum eins hratt og við getum undir læknishendur. Þetta er bara hluti af heilbrigðiskerfinu,“ segir Arnar Friðriksson, framkvæmdastjóri Norlandair.
Mikilvægt er að tryggja áframhaldandi rekstur sjúkraflugsins og halda við minni flugvöllum á landsbyggðinni.
„Það er bara lífsspursmál að halda þessum flugvöllum vítt og breitt um landið í lagi þannig að sé hægt að nota þá fyrir sjúkraflug. Það hefur reynslan verið þannig að um leið og áætlunarflug hættir þá drabbast flugvellirnir niður,“ segir Arnar.
