Forsætisnefnd Reykjavíkurborgar samþykkti á fundi sínum í dag að vísa ráðningarsamningi við Hildi Björnsdóttur borgarstjóra til samþykktar borgarstjórnar. Ólíkt sumum ráðningarsamningum við bæjarstjóra annarra sveitarfélaga, sem fjallað hefur verið um, er það alveg skýrt hver heildarlaun Hildar eiga að vera en þegar allt er tekið með eru þau rétt undir þremur milljónum króna á mánuði.
Samningur á að gilda til loka maí árið 2030. Samkvæmt samningnum skulu laun Hildar vera 2.826.127 krónur á mánuði miðað við 1. janúar 2026 og taka breytingum í samræmi við launavísitölu til samræmis við ákvæði samþykktar um kjör og starfsaðstöðu kjörinna fulltrúa hjá Reykjavíkurborg. Er þetta ólíkt ráðningarsamningi Kópavogsbæjar við Ásdísi Kristjánsdóttur bæjarstjóra en hennar laun eiga að taka breytingum í samræmi við þróun þingfararkaups.
Þetta fær Ásdís í laun – Minnihlutinn kallar eftir meira gagnsæi
Segir í ráðningarsamningnum við Hildi að þetta séu föst laun og því sé ekki greitt aukalega fyrir vinnu sem unnin sé utan hefðbundins dagvinnutíma. Um sé að ræða heildarlaun borgarstjóra og í þeim séu innifalin laun fyrir setu í ráðum og nefndum Reykjavíkurborgar. Laun samkvæmt þessari grein samningsins greiðist í sex mánuði eftir að ráðningartíma ljúki.
Hildur er einnig kjörinn fulltrúi eins og Ásdís en ólíkt þeirri fyrrnefndu fær sú síðarnefnda greitt aukalega fyrir setu í ráðum og nefndum á vegum þess sveitarfélags sem hún er ráðin til að stýra.
Hitt
Auk föstu launanna á Hildur að fá greiddan fastan starfskostnað að fjárhæð 167.112 krónur á mánuði miðað við 1. janúar 2026. Fjárhæð starfskostnaðar tekur breytingum til samræmis við ákvæði samþykktar um kjör og starfsaðstöðu kjörinna fulltrúa hjá Reykjavíkurborg. Þess er ekki getið sérstaklega í samningnum hvað teljist felast í slíkum kostnaði.
Fram kemur að Hildur eigi sama rétt og aðrir æðstu stjórnendur borgarinnar til meðal annars slysatryggingar en ólíkt ráðningarsamningum bæjarstjóra Akureyrar og Kópavogs er þess ekki getið að borgin greiði fyrir hana iðgjöld vegna líftryggingar.
Hildur fær síðan eins og forverar hennar í embætti borgarstjóra aðgang að embættisbifreið sem bílstjóri á vegum borgarinnar sér um að aka. Bæjarstjórar annarra af stærstu sveitarfélögum landsins fá hins vegar almennt greitt fyrir akstur á eigin bifreið, vegna starfs síns, en hvort þeir fá greitt fyrir ákveðinn kílómetrafjölda í hverjum mánuði eða samkvæmt akstursdagbók er misjafnt.
Segir enn fremur í samningnum að bílstjórinn aki Hildi til og frá vinnu og til og frá vinnutengdum fundum og viðburðum.
Loks endar samningurinn á uppsagnarákvæði en gagnkvæmur uppsagnarfrestur er 6 mánuðir og fari borgin fram á það ber Hildi að sinna starfinu út þennan frest. Hins vegar er ekkert í ákvæðinu um launagreiðslur í uppsagnarfrestinum ef Hildur tekur við öðru starfi á meðan uppsagnarfresti stendur en Ásdís Kristjánsdóttir fær, á meðan uppsagnarfresti stendur, greiddan mismun á launum bæjarstjóra Kópavogs og launum í nýju starfi fari svo að hún söðli um áður en hennar samningur rennur út og nýja starfið sé lægra launað.
