Menn sem dvöldu á vistheimilinu Bakkakoti sem börn segja mikilvægt að auka óboðað eftirlit á vistheimilum. Brýnt sé að sjá til þess að börn njóti stuðnings óháðra einstaklinga sem hlúi að hagsmunum þeirra.
Þetta kom fram á fundi sem þrír Bakkakotsmanna sátu í mennta- og barnamálaráðuneytinu í morgun. Bjarki Heiðar Bjarnason, lögmaður mannanna, segir ýmislegt hafa verið rætt á fundinum, meðal annars endurskoðun á núgildandi reglugerð um fóstur.
Bjarki segir skjólstæðinga sína hafa talað á fundinum fyrir mikilvægi þess að börn fái stuðning í upphafi fósturvistunar.
„Stundum hefur þetta verið þannig og örugglega allt of oft að börn eru bara sótt í skólann þar sem þau eru og fá þá jafnvel ekkert að vita hvert þau eru að fara. Síðan er þeim bara skutlað einhvert út í sveit og þau skilin eftir í fósturvistun. Skjólstæðingar mínir lýsa tengslaröskun og miklu áfalli við þetta og það er mjög sársaukafullt að ganga í gegnum svona miklar breytingar.“
Mikilvægt að taka mið af sjónarmiðum Bakkakotsmanna
Bjarki segir skjólstæðinga sína leggja ríka áherslu á að stjórnvöld tryggi óboðað eftirlit á vistheimilum og að slíkt sé framkvæmt oftar. Hann segir mennina einnig hafa talað fyrir því að börn sem fari í fóstur finni að fullorðnir gæti hagsmuna þeirra.
Það gefi reglugerðinni meiri vigt að við þróun hennar sé tekið mið af sjónarmiðum fólks sem dvalið hefur á vistheimilum.
„Það er kannski bara réttlætismál líka að leyfa þeim að tala. Leyfa þeim að koma fram með sjónarmiðin og segja frá því hvernig eftirlitið var í reynd,“ segir Bjarki.
„Það kannski stóð í einhverri reglugerð að svona og svona ætti þetta að vera en þegar á hólminn var komið var þetta allt öðruvísi. Menn voru kannski líka stundum bara að tikka í einhver box og hittu barnið í örskamman tíma. Þó það sé kannski ekki vondur ásetningur að baki þá er þetta samt kerfi sem hefur bara ekki virkað alveg nógu vel, það verður bara að segjast eins og er.“
