Hútar hafa varað Bandaríkjastjórn við því að blanda sér inn í stríðsátökin milli Húta og Sádi-Arabíu. Mohammed Al Bukhaiti, háttsettur maður í skæruliðasveitum Húta, sagði við AFP fréttaveituna að ef Bandaríkin taki þátt í árásum með Sádi-Aröbum á Jemen þá ætli Hútar að bregðast við hratt og af mikilli hörku.
Hútar hafa gert miklar árásir á Sádi-Arabíu síðustu daga, meðal annars á olíuflutningaskip, orkuinnviði og mannskæðar árásir á alþjóðaflugvöllinn í Ríad. Alls hafa 18 verið drepnir í árásunum og yfir 300 særst.
Eftir árásina á laugardag sagði Donald Trump Bandaríkjaforseti að hann væri að íhuga hvort Bandaríkin ættu að taka þátt í árásum Sádi-Arabíu á Húta. Hann hefur fram til þessa neitað beiðni Sádi-Araba um hernaðarlegan stuðning.
Miklar sprengingar heyrðust í Ríad í dag en loftvarnarkerfi skutu niður fjölda flugskeyta. Alþjóðaflugvöllurinn í Ríad er enn lokaður. Flugfélögin Qatar Airways og Etihad Airways hafa stöðvað öll flug tímabundið til Sádi-Arabíu.
Starfsfólk bandaríska sendiráðsins í Sádi-Arabíu þarf að fá sérstakt leyfi til að fara um flugvelli landsins. Bandarískum ríkisborgurum hefur jafnframt verið ráðlagt að vera sérstaklega varkár.
