„Fallegasti og besti Hagamelurinn okkar er kominn á sölu. Við fluttum hér inn í mjög illa farið hús árið 2020 og gerðum bókstaflega allt upp sem hægt var að gera upp, bæði að innan og utan. Nýflotuð gólf, parket, nýtt eldhús, nýtt bað, nýtt neysluvatn og frárennsli, nýir ofnar, nýjar raflagnir, múrviðgerðir að utan, endursteyptur þakkantur og endursteinað og létum sérsmíða þennan fáránlega flotta bogadregna franska glugga. Hans verður sárt saknað!“ segir Halldór um eignina í Facebook-færslu.
„Hér hefur okkur liðið alveg ofboðslega vel, á besta stað í Vesturbænum í fallegum klassískum arkítektúr Einars Sveinssonar. Hér fórum við úr þriggja manna fjölskyldu upp í fimm manna fjölskyldu og því er okkur farið að vanta aðeins meira olnbogarými.“
Íbúðin er á annarri hæð í fjölbýlishúsi sem var reist árið 1947 og hefur hún verið endurskipulögð og endurnýjuð á síðustu árum. Eignin samanstendur af þremur svefnherbergjum, baðherbergi, stofu, forstofu og baðherbergi auk þess sem á baklóð hússins er hjólaskýli.
Komið er inn í íbúðina í gegnum sameiginlegan inngang í rúmgott hol með eikarparketi en þaðan er gengið inn í önnur rými íbúðarinnar. Stofan er björt með stórum gluggum og eikarparketi og opnast hún að hluta inn í eldhús og borðstofu sem áður var önnur af tveimur stofum íbúðarinnar. Frá stofunni er einnig gengið út á litlar svalir.
Í eldhúsinu er dökk innrétting með skápaplássi, eyja með viðarborðplötu, spanhelluborð, gufugleypir, bakaraofn og innbyggður ísskápur og frystir. Við eldhúsið er björt borðstofa með stórum gluggum á tvo vegu.
Svefnherbergin eru björt með eikarparketi á gólfum. Baðherbergið er flísalagt með gólfhita, handklæðaofni, upphengdu salerni, viðarlitaðri baðinnréttingu og rúmgóðri sturtu með glerþili.
Nánar má lesa um eignina á fasteignavef Vísis.
