Á sama tíma og mörg Evrópuríki hafa hert stefnu gegn innflytjendum hafa Spánverjar farið í aðra átt og ætla að veita allt að hálfri milljón manna dvalarleyfi í landinu. Stjórnvöld segja betra að fólkið sé skráð, þá greiði það skatta og njóti réttinda á vinnumarkaði.
Talið er að á Spáni séu um 850.000 óskráðir innflytjendur. Margir þeirra sinna umönnunarstörfum á einkareknum hjúkrunarheimilum, starfa í landbúnaði, við þrif eða í byggingarvinnu. Framlag innflytjenda er talið ein helsta ástæða þess að hagvöxtur á Spáni hefur verið meiri en að meðaltali í ríkjum ESB.
Fá greitt í reiðufé og njóta ekki sömu réttinda og aðrir
Spænsk stjórnvöld hafa hrundið af stað átaki sem miðar að því að veita um hálfri milljón innflytjenda dvalarleyfi í eitt ár. Hægt verður að sækja um framlengingu. Einu kröfurnar eru að fólk hafi komið til Spánar fyrir síðustu áramót og hafi hreint sakavottorð.
Ein þeirra sem hafa sótt um er Luna Jayat frá Argentínu. Hún kom til Spánar fyrir þremur árum og hefur starfað á skrifstofu í Madríd. Þar hefur hún fengið greitt í reiðufé og ekki getað greitt í lífeyrissjóð. „Ég vinn og fæ greitt og það hefur verið allt og sumt.“
Dvalarleyfið gildir aðeins á Spáni
Hægt er að sækja um til loka þessa mánaðar og raðirnar eru langar. Skiptar skoðanir eru um framtakið. Helstu rök stjórnvalda eru að eftir að fólk fái dvalarleyfi fari það að greiða skatta. Eins fái það sömu réttindi á vinnumarkaði og aðrir. Pilar Cancela Rodríguez, ráðherra innflytjendamála, segir umræðu hafa verið um það að fólkið sem nú fái dvalarleyfi á Spáni eigi eftir að flykkjast til annarra Evrópusambandsríkja. „Heimildin sem veitt er með skráningunni gildir aðeins um búsetu og vinnu á Spáni. Þetta er fólk sem er komið hingað og er oft byrjað að vinna.“
