Gunnar Þórðarson tónlistarmaður er látinn, 81 árs að aldri. Hann setti mark sitt á íslenska tónlistarsögu og var afar fjölhæfur tónlistarmaður.
Gunnar Þórðarson fæddist 4. janúar 1945 á Hólmavík, sonur Guðrúnar Guðbjörnsdóttur og Þórðar Björnssonar. Hann fluttist ungur til Keflavíkur og það er meðal annars vegna hans sem bærinn er kallaður bítlabærinn.
Gunnar var gítarleikari, söngvari, upptökumaður, útgefandi, stjórnandi og ýmislegt fleira – og eitt stærsta nafnið í íslenskri tónlistarsögu. Hann var til að mynda í hljómsveitunum Hljómum, Trúbroti við samruna Hljóma og Flowers, Ríó Tríó og Lummunum.
Með þessum lögum um miðjan sjöunda áratuginn hafði Gunnar skapað sér nafn sem lagahöfundur. Hann var afar fjölhæfur tónlistarmaður og kom víða við: hann samdi tónlist fyrir bíómyndir, útsetti og tók upp tónlist annarra, og samdi óperuna Ragnheiði, sem á sínum tíma sló aðsóknarmet í Íslensku óperunni.
Margir af þekktustu tónlistarmönnum þjóðarinnar hafa komið fram á afmælistónleikum Gunnars í tímans rás og þakkað honum fyrir framlag hans til íslenskrar tónlistar.
Gunnar hlaut fjölmargar viðurkenningar á löngum ferli: hann var fyrsti popptónlistarmaðurinn til að fá listamannalaun og fékk heiðursmerki hinnar íslensku fálkaorðu árið 2002 fyrir framlag til íslenskrar tónlistar.
Hann fékk heiðursverðlaun Íslensku tónlistarverðlaunanna árið 1996 og var borgarlistamaður Reykjavíkur árið 2014. Eftirlifandi eiginkona Gunnars er Sigrún Toby Herman. Hann eignaðist fimm börn og fjögur þeirra eru á lífi.
Heimildarmyndin Tónskáldið – Gunnar Þórðarson eftir Ágúst Guðmundsson og Jón Þór Hannesson var sýnd árið 2024. Heimildarmyndin er í tveimur hlutum og fjallar um ævintýralegan feril Gunnars og er þroskasaga tónskálds sem aldrei fór í tónlistarskóla.
Sjónvarpsþátturinn Þitt fyrsta bros: Gunnar Þórðarson frá 1991 byggir á tónlist eftir Gunnar. Dagskráin er látin gerast í framtíðinni þegar vinnustofur Gunnars finnast í iðrum jarðar. Þegar flett er í gömlum gögnum koma gersemar í ljós.
Í þættinum koma fram söngvararnir Björgvin Halldórsson, Egill Ólafsson, Pálmi Gunnarsson og Ragnhildur Gísladóttir ásamt dönsurum úr Íslenska dansflokknum undir stjórn Láru Stefánsdóttur og leikhópnum Perlunni. Egill Eðvarðsson sá um dagskrárgerð.
