Greiðslumiðlunarfyrirtækið Rapyd hefur sagt upp um fjörutíu starfsmönnum vegna skipulagsbreytinga á alþjóðavísu. Skipulagsbreytingarnar hafa það í för með sér að gervigreind mun leysa af störf fjölda starfsmanna. Vísir greinir frá þessu.
Samkvæmt frétt Vísis fengu starfsmenn Rapyd tölvupóst frá Arik Shtilman forstjóra Rapyd í dag. Í póstinum, sem Vísir hefur undir höndum, boðar hann til starfsmannafundar 2. júní vegna uppsagnanna.
Hann segir að með innleiðingu gervigreindar hafi fyrirtækið gjörbreytt verklagi sínu og hvernig störf séu unnin. Hann segir að með þessari innleiðingu geti fyrirtækið starfað hraðar, aukið nákvæmni og skilað betri árangri fyrir viðskiptavini fyrirtækisins.
Rapyd verði áfram skuldbundið íslenska markaðnum
Í skriflegu svari Garðars Stefánssonar, forstjóra Rapyd Europe, til fréttastofu segir að breytingarnar séu á alþjóðavísu. Hjá Rapyd á Íslandi starfa rúmlega 120 starfsmenn.
„Í dag voru gerðar skipulagsbreytingar hjá Rapyd á alþjóðavísu. Samhliða alþjóðlegum framförum í gervigreind og sjálfvirknivæðingu verður Rapyd áfram skuldbundið íslenska markaðnum. Á Íslandi erum við með einstaklega öflugan hóp, rúmlega 120 starfsmenn, sem mun áfram stýra, byggja upp og þróa nýjar fjártæknilausnir fyrir okkar mikilvægu innlendu viðskiptavini sem og þau alþjóðlegu fyrirtæki sem við þjónustum. Undir þessu nýja og nútímavædda rekstrarlíkani munu viðskiptavinir okkar njóta góðs af nýjum lausnum, hraðari innleiðingu og meira rekstraröryggi.“
Í samtali við fréttastofu segist Garðar ekki ætla að tjá sig frekar að svo stöddu.
Í tölvupósti Shtilman til starfsmanna segir að þeim starfsmönnum sem verði fyrir áhrifum breytinganna verði tilkynnt um það í dag.
