Nepalskur fjallaleiðsögumaður sem saknað hafði verið í sex daga í hlíðum Mount Everest fannst lifandi í morgun. Hann fannst skríðandi í átt að grunnbúðum í fjallinu.
Þyrla var kölluð út til að flytja hann á spítala í Katmandú, höfuðborg Nepals.
Leiðsögumaðurinn, Hillary Dawa, var á ferð með Chris Thrall, breskum göngumanni, sem hann hafði fylgt á toppinn 29. maí. Leiðir skildu degi síðar, eftir að þeir gengu af stað úr búðum 4, sem eru í 7.950 metra hæð.
„Hann settist niður til að hvílast, þessir menn bara svakalegar byrðar,“ segir Thrall. „Ég sneri mér við og sagði: „Hillary, er allt í lagi með þig?“ Hann segir: „Já, já. Allt í góðu Chris. Haltu bara áfram!“ Þetta er alvanalegt. Ég held áfram og svo heldur hann áfram,“ bætir Thrall við.
Aðstæður erfiðar
Hann hafi síðan rekist á pólskan göngumann sem átti í erfiðleikum eftir að hann kláraði súrefnisbirgðirnar sínar. Hann var auk þess kalinn á fingrum. Thrall segir að þarna hafi hann þurft að gera upp við sig hvort hann myndi snúa við til að athuga með leiðsögumanninn eða hjálpa pólska göngumanninum. Hann hafi metið það sem svo að það yrði í lagi með sjerpann, enda hafi hann farið þessa ferð margoft áður.
Þeir héldu því tveir saman niður í þriðju búðir. Aðstæður voru erfiðar og gangan tók þá ellefu klukkustundir en hefði undir venjulegum kringumstæðum tekið tvær.
Í það minnsta fimm látist á þessu tímabili
Þegar ekkert hafði spurst til leiðsögumannsins voru leitarflokkar gerðir út. Hann komst af sjálfsdáðum næstum niður í grunnbúðir.
Fjallgöngutímabilinu á Everest er við það að ljúka og því voru fáir í fjallinu. Yfir þúsund fjallgöngumenn náðu toppi Everest á þessu tímabili samkvæmt tölum yfirvalda í Nepal. Þeir hafa sjaldan verið fleiri. Í það minnsta fimm hafa látist á Everest á tímabilinu.
