Fallegt og mikið endurnýjað einbýlishús við Nönnustíg 6 í Hafnarfirði hefur verið sett á sölu fyrir 130 milljónir króna. Húsið, sem var byggt árið 1929, er 160 fermetrar að stærð og stendur á grónum og eftirsóttum stað í gamla bænum, skammt frá Hellisgerði og miðbæ Hafnarfjarðar.

Húsið er á þremur hæðum og býður upp á fjögur til fimm svefnherbergi. Á miðhæð er forstofa sem opnast inn í bjart og rúmgott alrými þar sem stofa, borðstofa og eldhús mynda samfellda heild. Eldhúsið er opið yfir í stofu með eyju á milli og úr stofunni er gengið út á rúmgóðar suðvestursvalir.

Á efri hæð eru þrjú svefnherbergi, þar af hjónaherbergi með fataherbergi og útgengi á svalir. Þar er einnig baðherbergi með baðkari.

Í kjallara er sérinngangur sem gerir mögulegt að útbúa aukaíbúð. Þar eru meðal annars stofa, rúmgott herbergi og þvottahús. Þessi möguleiki getur hentað vel fyrir fjölskyldur sem vilja hafa aðskilda íbúðareiningu eða nýta rýmið til útleigu.

Húsið hefur tekið töluverðum endurbótum á undanförnum árum og er garðurinn snyrtilegur. Staðsetningin þykir eftirsóknarverð, aðeins um fimm mínútna göngufjarlægð frá miðbæ Hafnarfjarðar, auk þess sem stutt er í skóla, þjónustu og útivistarsvæði.