Páll Vilhjálmsson skrifar:

Stór frétt í Bretlandi síðustu daga er af prófessor í háborg vísinda og fræða, sjálfum Cambridge-háskóla sem telst til þeirra fremstu í heimi. Jason Arday var yngsti blökkumaðurinn til að verða prófessor í Cambridge fyrir þrem árum. Á miðvikudagskvöld sagði hann af sér.

Prófessor Arday er afhjúpaður ritþjófur. Doktorsritgerð hans er að stórum hluta stolinn texti. Til að bæta gráu ofan á svart er ferilsskrá hans, þegar nánar var að gætt, ein samfelld lygasaga. Snilli Arday var að ljúga nógu stórt annars vegar og hins vegar laga lygina að heimsmynd frjálslynda vinstrimanna.

Ævintýralegar lygar Arday eru m.a. að vegna einhverfu byrjaði hann ekki að tala fyrr en 11 ára og lærði fyrst að lesa 18 ára. Þá hljóp hann 600 mílur á sex dögum, þar af fótbrotinn í þrjá daga, safnaði 5,5 milljónum punda fyrir góðgerðasamtök, var atvinnumaður í fótbolta, fór í skurðaðgerð við krabbameini í heila meðan hann skrifaði doktorsritgerðina og boraði fyrir vatni í fátækum ríkjum í Suður-Ameríku og Afríku. Allt lygar handa gáfuðum vinstrimönnum - sem þeir kokgleyptu eins og til var ætlast.

Íslenskir fjölmiðlar sýna sögu Jason Arday lítinn áhuga. Heggur sagan líklega of nærri sjálfsmynd háskólagenginna blaðamanna. Frosti á Nútímanum heldur uppi merkinu og segir sögu lygamarðar í Cambrigde. Frétt Nútímans byggir á færslu Kolbeins Stefánssonar er tekur vara á ískyggilegri þróun háskólasamfélagsins.

Hnignun vestrænna háskóla á sér eina meginskýringu og kallast hún DEI á útlensku. Skammstöfunin stendur fyrir fjölbreytileika, jöfnuð og inngildingu (diversity, equity, inclusion). DEI hugmyndafræðin gerir bágindi, andleg meðtalin, að æðstu dygð. Þeir eru mestir, bestir og gáfaðastir sem fyrrum voru kallaðir aumingjar til hugar og handa. Prófessor Arday, nú fyrrum prófessor, er vel lesinn í Dei-fræðum og hannaði ferilsskrá sína til samræmis. Fádæma framgangur hans í heimi vísinda og fræða staðfestir að háskólar valdefla dáðleysi og verðlauna dára.

Fyrir þrem árum heimsótti skoski sagnfræðingurinn Niall Ferguson England. Ferguson fékk í upphafi aldar stöðu í Harvard í Bandaríkjunum. Frá um 2014 sér hann DEI-fræði og vók eyðileggja bandarískt háskólasamfélag, Harvard-háskóla meðtalinn. Í heimsókninni til Englands varaði sagnfræðingurinn enska háskólasamfélagið að apa DEI-fræðin eftir bandarískum háskólum. DEI er helvegur háskóla, sagði Skotinn.

Sama ár og Ferguson útlistaði DEI-fáviskuna gerði Cambridge-háskóli Arday að prófessor. Þremur árum síðar er Cambridge með buxurnar á hælunum. Fyrrum nemendur Arday krefjast bæði endurskoðunar á einkunnum og endurgreiðslu skólagjalda.

Tilkynning Cambridge-háskóla fyrir þremur árum, um prófessorsstöðu Arday, varð fréttaefni. Gamall karl, sem rekur youtube-rás, rak augun í fréttina og las sér til um málið í tvær til þrjár klukkustundir. Niðurstaða karlsins var að hér væri eitthvað stórlega brogað á ferðinni og tíundaði dæmi um að Arday væri ekki allur þar sem hann er séður. Gamlingjar trúa ekki eins og nýju neti öskubuskusögum skrifuðum eftir DEI-handriti.