Formaður Byggiðnar, félags byggingarmanna, sagði í kvöldfréttum sjónvarps í gær að brögð væru að því að ófaglærðir væru ráðnir í stað faglærðra iðnaðarmanna í byggingariðnaði. Því fylgdi meðal annars fleiri gallar í byggingum.
„Við höfum engin töluleg gögn yfir það, hvert hlutfallið er, en ef þróunin er að verða sú að faglærðum er að fækka, þá deilum við auðvitað áhyggjum af því,“ segir Jörundur Blöndal, teymisstjóri öryggis og eftirlits mannvirkja hjá Húsnæðis- og mannvirkjastofnun.
Eftirlit mikilvægara eftir því sem faglærðum fækkar
Jörundur segir að tillögum HMS um breytt byggingareftirlit, sem birtust í lok síðasta mánaðar, sé meðal annars ætlað að safna gögnum sem gætu sýnt fram á slíkt samhengi. Í nýja fyrirkomulaginu færist byggingareftirlit frá byggingarfulltrúum til óháðra skoðanastofa sem starfa í umboði HMS.
„Ég held að það sé augljóst mál að ef það verði aukning á því að ófaglærðir fari að sinna störfum sem faglærðir eiga að sinna, þá verður a.m.k. þeim mun mikilvægara fyrir þá sem standa að verkunum að sinna öflugu eftirliti með þeim verkum sem eru unnin,“ segir Jörundur.
Og þetta er eitt af því sem þið vonist til að þetta nýja fyrirkomulag skili? „Já. Það er ætlunin.“
