Ari Edwald, oddviti Miðflokksins í Reykjavík, segir það koma á óvart að sjá Sjálfstæðisflokkinn mynda meirihluta með Viðreisn og Framsókn fremur en Miðflokknum. Hann segir ekkert hafa staðið í vegi fyrir því að Sjálfstæðisflokkurinn hafi getað unnið með Miðflokknum.
Tilkynnt var um meirihlutasamstarf Sjálfstæðisflokksins, Framsóknarflokksins og Viðreisnar fyrr í dag. Mun Hildur Björnsdóttir taka við embætti borgarstjóra á meðan Einar Þorsteinsson, oddviti Framsóknar, verður formaður borgarráðs og Björg Magnúsdóttir, oddviti Viðreisnar, forseti borgarstjórnar.
Skýrt ákall um samstarf Miðflokksins og Sjálfstæðisflokksins
„Í rauninni hef ég sagt það alveg frá því að kosningaúrslitin lágu fyrir að þau væru skýrt ákall um meirihlutasamstarf Miðflokks og Sjálfstæðisflokks. Það voru þessir flokkar sem unnu kosningasigur og í raun jafn stóran sigur. Við bættum við okkur jafn mörgum prósentustigum og borgarfulltrúum og Sjálfstæðisflokkurinn, en komum náttúrulega úr mjög litlu fylgi og engum borgarfulltrúa,“ segir Ari er hann er spurður um viðbrögð sín við nýjum meirihluta í borginni.
„Miðflokkurinn vann hlutfallslega stærstan sigur í þessum kosningum og það var út af þeim málum sem flokkurinn barðist fyrir af krafti og setti á dagskrá. Bæði voru baráttumál flokkanna, Sjálfstæðisflokks og Miðflokks, mjög samrýmanleg og svo er augljóst að stuðningsmenn flokkanna studdu [samstarf].“
„Það hlýtur að koma mjög á óvart“
Þá segir Ari það „mjög skrýtið“ að sjá Sjálfstæðisflokkinn mynda samstarf við Viðreisn í ljósi þess hve frábrugðnar áherslur flokkanna voru, eins og t.a.m. varðandi borgarlínuna. Þá bendir Ari aukinheldur á að Viðreisn hafi farið með stjórn borgarinnar síðustu tvö kjörtímabil, sem og Framsóknarflokkurinn að hluta til.
„Þeir kjósa að fara fremur í samstarf með þeim flokkum sem bera ábyrgð á þeirri stefnu borgarinnar sem var verið að hafna heldur en að fara með þeim sem unnu með þeim sigur og eru með sömu áherslur. Það hlýtur að koma mjög á óvart, ég get nú ekki sagt annað.“
Ekkert sem stóð í vegi fyrir samstarfi
Ari fundaði með Hildi mánudaginn 18. maí og föstudaginn 22. maí.
Var eitthvað sérstakt á ykkar fundum sem kom í veg fyrir að þið gætuð farið í samstarf?
„Nei, ég kannast ekki við það,“ segir Ari og segir fundina hafa farið vel fram og að þar hafi borið á uppbyggilegum samskiptum.
„Það er ekkert sem hefði átt að standa í vegi fyrir því að flokkarnir gætu unnið saman.“
Rætt um Kjartan og Mörtu
Hann segir þá að talað hafi verið um að það gæti þvælst fyrir samstarfi flokkanna að fyrrverandi borgarfulltrúar Sjálfstæðisflokksins, Kjartan Magnússon og Marta Guðjónsdóttir, hefðu yfirgefið flokkinn á síðasta kjörtímabili og gengið til liðs við Miðflokkinn.
Segir Ari hins vegar að þegar Kjartan og Marta hafi gengið yfir í Miðflokkinn hafi verið búið að raða í efstu sæti listans og þau því endað í 13. og 15. sæti.
„Þannig að það er augljóst að þau koma ekki við sögu í þessu samhengi. En þetta var eitt af því sem var svona í umræðunni en ég leit nú alltaf á það sem einhvern spuna og eitthvað sem hefði ekki tengingu við raunveruleikann í þessu.“
„Það er alveg nýtt fyrir mér“
Á blaðamannafundinum var lagt til að Ari yrði nýr stjórnarformaður Orkuveitu Reykjavíkur. Sjálfur segist hann hafa fengið símtal þess efnis frá Hildi rétt fyrir klukkan 11 í dag, þegar blaðamannafundurinn hófst.
„Þá nefndi hún að hún hygðist leggja þetta til en það er alveg nýtt fyrir mér.“
Segist þó Ari gera ráð fyrir því að hann muni nú velta stjórnarformennskunni fyrir sér, en á þó ekki von á því að sú ákvörðun liggi fyrir fyrr en um miðjan júní.
„Ég virði alveg við Hildi það að þessi tillaga er vinsamleg í minn garð.“
