Kristrún Frostadóttir forsætisráðherra segir tímabundna lækkun á olíuverði hafa lækkað vísitölu um hátt í 0,3 prósentustig. Hún hafi verið sett á þegar óljóst var hvernig olíuverðsþróun yrði. Olíuverðshækkanir hafi þó ekki orðið jafn miklar og ríkisstjórnin óttaðist í fyrstu.
Ríkisstjórnin ákvað að lækka skatta á eldsneyti tímabundið til að draga úr verðbólgu eftir að árásir Bandaríkjamanna og Ísraela á Íran hófust í vor. Lækkunin rann út á miðnætti og olíuverð hækkaði um allt að 31 krónu.
Kristrún segir að það sem hafi keyrt verðbólguna áfram séu aðrir þættir þar sem olíuverð hafi bein áhrif, sem ríkisstjórnin geti ekki stýrt. Þar nefnir hún flugfargjöld sem dæmi. Yfirvöld þurfi að eiga í samtali við aðila vinnumarkaðarins um hvers konar aðgerða þurfi að grípa til.
Voru það vonbrigði fyrir ykkur að sjá að bensínið lækkaði kannski ekki jafn mikið og það hefði átt að lækka miðað við hvað þið lækkuðuð virðisaukaskattinn mikið?
Það er auðvitað bara til umræðu hvernig þróun verðs var í aðdraganda þessara breytinga og ég held að það muni skipta öllu máli að við höldum áfram sterku samkeppnislegu aðhaldi þegar kemur að olíufyrirtækjum og fleirum á almennum neytendamarkaði.
Þannig að þú útilokar ekki að leggja fram nýtt frumvarp þess efnis?
Við erum að skoða til að mynda takmarkanir á krónutölugjöldum, við erum að skoða aðrar aðgerðir með vinnumarkaðnum. Þannig að við erum að reyna að nálgast þetta svolítið heildrænt vegna þess að það kostar líka peninga að fara í þessa niðurgreiðslu og spurningin er bara hvar er honum best varið og hvort við munum mögulega sjá fyrir endann á þessum olíuverðshækkunum núna á næstu vikum.
