Allt frá því að dularfullur dróni búinn sprengju sveif inn á flugvöllinn í Leipzig í austurhluta Þýskalands snemma í ágúst hafa böndin borist að Rússum.
Til þessa hafa ráðamenn talað um að „erlend öfl“ beri ábyrgð á árásunum. Þjóðverjar hafa ekki viljað ganga svo langt að saka erlent ríki opinberlega um árásir innan landamæra Þýskalands.
En á fréttamannafundi síðdegis tóku þeir Johan Wadepulh utanríkisráðherra og Alexander Dobrindt innanríkisráðherra af allan vafa. Dobrindt sagði að lögreglurannsókn, ummerki árásanna og leyniþjónustuupplýsingar samanlagt sýndu svo ekki verði um villst að Rússar hefðu verið að verki.
Dobrindt bætti við að ekki væri nóg að búnaður og aðferð bæru verksummerki sem líktust fyrri rússneskum aðgerðum; hann segir að leyniþjónustuupplýsingar bendi til að þeir sem að verki voru hafi starfað í umboði opinberra stofnana í Rússlandi. Með því vísar hann í raun til leyniþjónustustofnana en tiltekur ekki hver þeirra er talin hafa verið að verki.
Hann sagði framkvæmdina hafa verið fagmannlega undirbúna og krafist bæði mikillar tæknikunnáttu og skipulags. En að þeir sem mættu með búnaðinn sem „low level agents“, það er að segja þeir voru ekki háttsettir útsendarar heldur líklega lausráðnir smáglæpamenn eða málaliðar sem fengu greitt fyrir verkefnið.
Þýska ríkisstjórnin lítur ekki á málið sem einangrað atvik.
Dobrindt sagði Þýskaland vera áfram skotmark rússneskra árása af þessu og að stjórnvöld teldu hættu á frekari aðgerðum verulega.
„Við erum ekki í stríði en erum daglegt skotmark“, sagði Alexander Dobrindt, innanríkisráðherra Þýskalands, á fréttamannafundi síðdegis.
Wadepuhl utanríkisráðherra sagði leiðtoga Rússlands með þessu hafa tekið upplýsta ákvörðun um að skaða samskipti við Þýskaland með þessum árásum og væru samskiptin þó ekki upp á marga fiska.
Þjóðverjar ætla þó ekki að ganga svo langt að gjalda líku líkt. Gripið verður til diplómatískra aðgerða: Rússnesku aðalræðisskrifstofunni í Bonn verður lokað frá 18. september og leigusamningi stórrar, rússneskrar menningarmiðstöðvar í Berlín verður sagt upp. Grunur leikur á að þessar stofnanir séu bækistöðvar njósnara og spellvirkja rússnesku leyniþjónustunnar.
Þjóðverjar ætla jafnframt að þrýsta á harðari aðgerðir gegn skuggaflota Rússa, hindra verði olíuútflutning sem sé tekjulind fyrir Rússa sem og að hindra að nota megi skip úr þessum flota til skemmdarverka, jafnvel árása.
Þá sögðust ráðherrarnir hafa undir höndum nafnalista fólks sem talið væri tengjast fjölþáttaárásum af þessu tagi og að hert yrði á takmörkunum sem giltu fyrir rússneska ríkisborgara.
Friedrich Merz, kanslari Þýskalands, sagði í síðustu viku að hver sá sem bæri ábyrgð á sprengjudrónaárásinni yrði látinn gjalda þess.
Þrír drónar eru taldir hafa verið notaðir í árás á flugvöllinn í Leipzig. 4. ágúst fannst dróni við hlið úkraínskrar fraktvélar. Sá dróni reyndist hafa flogið inn á völlinn nokkrum klukkustundum fyrr, búinn sprengju, en skall á vélinni, sprengjan datt af og hvellhettan virkaði ekki. Sprengjan var engin smásprengja, þýskir fjölmiðlar segja hana hafa verið með helmingi meira sprengiefni en notað var til að granda Boeing 747 farþegavél yfir Lockerbie í Skotlandi í desember 1988.
Talið er að annar dróni hafi skollið á fraktvél frá DHL nokkrum mínútum síðar en hugsanlega tæst í hreyfli vélarinnar svo að ekkert af honum hefur fundist. Nokkrum dögum síðar fannst þriðji dróninn í nágrenni vallarins.
Nokkru austar, í Póllandi, segja yfirvöld heldur engan vafa leika á að fjölda atvika þar í landi megi rekja til Rússa, nú síðast um helgina í verksmiðju sem framleiðir búnað í flugvélar og þyrlur, en hún brann til grunna. Eldur kom upp aðfaranótt mánudags í verksmiðju WB Electronics, sem framleiðir dróna og búnað sem meðal annars er notaður af úkraínska hernum. Öryggismyndavélar sýna grímuklæddan mann fara inn með bakpoka og kveikja eld. Saksóknarar rannsaka málið sem mögulega starfsemi fyrir erlenda leyniþjónustu og hryðjuverk. Radoslaw Sikorsky, utanríkisráðherra Póllands, var ómyrkur í máli þegar hann ræddi við fjölmiðla í dag.
Rússar reyna allt hvað þeir geta til að sannfæra alla um að þeir séu í stríði við vestrið, jafnvel þótt við viljum það ekki, og að þeir standi fyrir skemmdarverkum, íkveikjum, pólitískum launmorðum og hryðjuverkum.
Og hann ítrekaði að enginn vafi léki á því að Rússar stæðu fyrir fleiri atvikum, til að mynda þegar slóvakíska lögreglan handtók þrjá vegna gruns um að ætla að gera árás á drónaverksmiðju þar í landi, í Eistlandi var kveikt í drónaverksmiðju í ágúst og sprengingar urðu hjá vopnaframleiðendum í Búlgaríu. Rússar hafna því með öllu að hafa komið nærri þessum atvikum.
