Gjaldtaka hófst á miðnætti um nýju brúna yfir Hornafjarðarfljót. Hún var tekin í notkun 24. júní og hefur verið gjaldfrjálst að aka um hana síðan þá. Nú kostar 1500 krónur að aka yfir brúna. Veggjöldin eiga að standa undir hluta kostnaðar við framkvæmdina, sem kostaði tíu milljarða. Hámarksgjald fyrir akstur yfir brúna er 18.750 krónur á mánuði eða 225.000 krónur á ári.
Gjaldtakan er sjálfvirk og gengur það ágætlega að mati forstjóra Bílaleigu Akureyrar sem rukkar viðskiptavini sína eftir á.
„Þetta kemur beint í gegnum miðlægan gagnagrunn, þá kemur þetta beint inn í okkar kerfi. Það er að segja ef viðskiptavinur greiðir ekki þá kemur þetta, innan ákveðinna klukkutíma, beint inn á okkar kerfi og þar með inn á leigusamninginn hjá viðkomandi. Það sem er stór hluti af vandanum hjá okkur er að við erum orðnir svo miklir innheimtumenn fyrir ríkissjóð að hálfa væri nóg og það lendir alltaf eitthvað á okkur,“ segir Steingrímur Birgisson, forstjóri Bílaleigu Akureyrar.
Bílaleigur landsins rukka þó nokkuð af gjöldum eftir á. Þar nefnir hann sem dæmi bílastæðagjöld eða hraðasektir sem ferðamenn fá. Þá hefur bæst ofan á kílómetragjaldið og nú þessar sjálfvirku gjaldtökur í Vaðlaheiðargöngum og við Hornafjarðarfljót. Þá er útlit fyrir að einnig verði rukkað yfir brúna yfir Ölfusá þegar hún verður tilbúin.
„Það eru auðvitað takmörk hvað er hægt að leggja miklar álögur á ferðamenn endalaust. Og í þessu tilfelli líka takmörk fyrir því hvað er hægt að leggja á í kostnað á bílaleigur landsins að þær taki á sig. Bæði fyrir utan beinan kostnað af því sem innheimtist ekki af viðskiptavinum þá er gríðarlega mikil vinna sem fer í þetta líka.“
Auka kostnaður upp á næstum 30.000 krónur fyrir ferðamenn
Steingrímur telur að aukakostnaður fyrir ferðamann sem ætlar að keyra hringinn í kringum landið gæti numið allt að 30.000 krónum þegar byrjað verður að rukka fyrir Ölfusárbrú. Kílómetragjaldið er um 20.000 krónur og þá kostar rúmlega 2200 krónur í Vaðlaheiðargöng og 1500 krónur yfir Hornafjarðarfljót. Óvíst er hvað mun kosta yfir Ölfusárbrúna. Samkvæmt vef Vegagerðarinnar og Stjórnarráðsins eiga veggjöld að standa straum af 50% af kostnaði við framkvæmdir á borð við þær fyrrnefndu. Áætlað er að brúin yfir Ölfusá kosti 18 milljarða. Framkvæmdirnar við Hornafjarðarfljót kostuðu um tíu milljarða.
Hluti af þessum kostnaði komi alltaf til með að falla á bílaleigurnar:
„Kílómetraskatturinn er búinn að kosta gríðarlegar fjárhæðir í okkar tilfelli og mikla vinnu og ekki séð fyrir endann á því ennþá. Við erum að rukka kílómetraskattinn, rukka bílastæðagjöldin hér og þar og alls staðar. Og nú erum við að rukka þetta innviðagjald. Það sem er sammerkt með þessum gjöldum og innheimtu er hækkaður ferðakostnaður við að koma til landsins.“
Samstarf við Vegagerðina gott
Steingrímur gagnrýnir fyrirvarann á þessum gjöldum sem og upplýsingagjöf til ferðafólks. Ekki sé hægt að bæta útskýringum um hin ýmsu gjöld og tolla á starfsfólk Höldurs í Keflavík, þar sem langar raðir myndast oft og þarf að hafa hraðar hendur við afgreiðslu bíla:
„Það er mjög mikil vinna sem fer í að útskýra þetta fyrir fólki. Við getum ekki farið í gegnum þetta á afgreiðsluborðinu í Keflavík sem dæmi því það myndi tefja afgreiðsluna um fleiri, fleiri mínútur og það eru nú þegar fyrir langar biðraðir og ekki verður þetta bætandi á. Það þarf að koma þessum upplýsingum til skila fyrr, áður en kúnninn kemur til landsins og svo með góðum upplýsingum og merkingum á þessum stöðum. Við höfum átt mjög gott samstarf við Vegagerðina sem eru öll af vilja gerð til þess að vinna hlutina vel.“
Þá segir hann að fyrirvarinn hefði mátt vera meiri frá stjórnvöldum. Að hans sögn var þetta samþykkt á þingi rétt fyrir sumarfrí og gjaldtakan er hafin:
„Þetta er alltof stuttur fyrirvari til þess að tilkynna okkar samstarfsaðilum því við erum að vinna með þeim 12-18 mánuði fram í tímann. En ég er bara bjartsýnn á að það takist að vinna þetta vel en öllum svona málum þarf að gefa meiri fyrirvara en verið er að gera.“
