24 ára íslenskur karlmaður lést í fallhlífarstökki í Óðinsvéum í Danmörku í dag.
Slysið varð rétt fyrir hádegi að dönskum staðartíma.
Maðurinn hafði nýlokið fallhlífarstökksnámskeiði og var í sínu fyrsta stökki einn þegar slysið varð.
Samkvæmt fréttatilkynningu frá dönsku lögreglunni báru endurlífgunartilraunir ekki árangur og atvikið er rannsakað sem slys.
Vitni hafa fengið áfallahjálp.
Hugur allra er hjá aðstandendum mannsins
Nikolaj Nedovic Larsen, framkvæmdastjóri fallhlífarmiðstöðvarinnar í Óðinsvéum, segir samfélagið í áfalli.
Hann segir samfélag fallhlífarstökkvara í Danmörku vera lítið og þar þekkist allir vel. Slys, eins og varð í dag, hafi djúpstæð áhrif á alla.
Nikolaj segir þunga áherslu á öryggismál hjá fallhlífarstökkvurum og nú sé það í höndum lögreglunnar að rannsaka tildrög slyssins.
„Þau sem voru á staðnum hafa fengið áfallahjálp í dag og ég sendi þeim mínar hlýjustu hugsanir. Ég get aðeins ímyndað mér hversu harmi slegnir aðstandendur eru og votta þeim mína dýpstu samúð.“
