Landsréttur staðfesti úrskurð Héraðsdóms og vísaði frá skaðabótamáli Ideal Company á hendur Eik fasteignafélagi á dögunum. Halldór Magnússon, eigandi Ideal Company (Imperial fataverslunar), vildi fá tæplega 250 milljónir í skaðabætur frá Eik fasteignafélagi, eiganda Glerártorgs á Akureyri. Samkvæmt upplýsingum fréttastofu var málinu vísað frá sökum formgalla og ætlar Halldór ekki að leggja árar í bát þar sem ekki hefur enn verið fjallað efnislega um stefnuna af dómstólum.
Halldór taldi sig hafa orðið fyrir mismunun og misnotkun af hálfu Eikar sem eiganda Glerártorgs, að hann hafi ekki fengið sömu kjör og aðrar, stærri keðjur og verslanir – sem einnig hafi fengið ýmsar ívilnanir sem Imperial fékk ekki.
Þá fór Imperial einnig fram á skaðabætur vegna tjóns af lokun verslunar á tímabili framkvæmda á árinu 2020, vegna tjóns af fækkun gesta á Glerártorgi og vegna sölutaps í kjölfar riftunar og lokunar verslunar á Glerártorgi. Eik á 50–55% af öllu verslunarhúsnæði á Akureyri samkvæmt úttekt Samkeppniseftirlitsins frá árinu 2024.
Í úrskurði Landsréttar kemur fram að Eik telji málavaxtalýsingu vera fulla af rangfærslum, gildishlaðna og gefi á engan hátt heildstæða mynd af þeim atvikum sem liggi til grundvallar. Málið var upphaflega höfðað í nóvember 2025. Eik fór fram á að málinu væri vísað frá í febrúar 2026. Héraðsdómur vísaði málinu frá í mars og Landsréttur staðfesti frávísunina nú í maí. Þá var Imperial gert að greiða Eik 500.000 krónur í málskostnað.
Imperial hafði verið á Glerártorgi í tæp 20 ár, eða frá 2007. Í júní 2025 rifti Eik leigusamningi við Imperial með vísan til ítrekaðra áskorana um greiðslur, sem Imperial hafði ekki staðið við. Imperial flutti í kjölfarið af Glerártorgi í miðbæinn á Akureyri.
Mikil samþjöppun á markaði á Akureyri
Að mati Samkeppniseftirlitsins er mikil samþjöppun á markaði verslunarhúsnæðis á Akureyri þar sem Eik á 50-55% af öllu verslunarhúsnæði og fasteignafélögin Reitir og Klettás eiga hvort um sig 15-20%. Að sögn Halldórs er þróunin á Glerártorgi afskaplega slæm en 15 aðilar, margir úr heimabyggð, hafa hætt rekstri á Glerártorgi á undanförnum árum og nýir komið í staðinn:
„Undanfarin ár hefur hljóðlát en sláandi þróun átt sér stað í hjarta verslunar á Akureyri. Ef maður gengur um ganga Glerártorgs í dag, mætir manni sjón sem mörgum bæjarbúum þykir sár: tóm rými, lokaðir gluggar og kunnugleg andlit horfin eitt af öðru.
Flóttinn er raunverulegur. Við höfum séð hvern aðilann á fætur öðrum hverfa á síðustu misserum ... auk þess sem næstum öll mathöllin – sem opnaði með miklum bumbuslætti fyrir rúmu ári síðan, er horfin. Þetta eru 15 aðilar ásamt 4 aðilum í mathöll, en um 36 rekstrarbil eru á Glerártorgi í dag.“
Á Glerártorgi má nú finna ýmsar verslanir á borð við H&M, Kappahl, Heimilistæki og Dressman.
Í svari Samkeppniseftirlitsins til fréttastofu kemur fram að mál tengd Glerártorgi séu á þeirra borði og að það fylgist með framvindu þess en formleg rannsókn er þó ekki til meðferðar hjá eftirlitinu. Eins kemur fram að ekki hefur verið ráðist í gagnaöflun eða rannsókn á fasteignamarkaði frá því að það gaf út skýrslu árið 2024, sem sýndi samþjöppun á markaði á Akureyri.
Friðrik Ársælsson, framkvæmdastjóri viðskiptavina hjá Eik, sagði í svari til fréttastofu að hann gæti ekki tjáð sig um einstaka mál sem eru til skoðunar hjá eftirlitsaðilum en benti þó á niðurstöðu Landsréttar þar sem kröfum Imperial var vísað frá.
Flótti úr glænýrri mathöll
Rétt fyrir jólin 2024 var Iðunn mathöll opnuð á Glerártorgi. Sex veitingastaðir voru opnaðir í jólatörninni en rýmið sem nú hýsir mathöllina hafði áður verið Kaffi Torg, sem var veitingastaður og kaffihús. Ráðist var í miklar breytingar á rýminu til þess að gera mathöllina að veruleika og félagið IMAK ehf. gerði leigusamning við Eik um rekstur mathallarinnar. Nú, 18 mánuðum síðar, eru aðeins tveir staðir opnir í Iðunni mathöll, IMAK hættir rekstri hennar og Eik tekin við. Eigendur tveggja staða sem fréttastofa hefur haft samband við eru að leita sér að öðru húsnæði til þess að reka staði sína en vildu ekki tjá sig frekar um ástæður þess að þeir hafi farið út úr mathöllinni.
Samkvæmt upplýsingum frá Eik fjölgaði gestum á Glerártorgi 6% árið 2025, en um 3% árið á undan.
Í svari við spurningu fréttastofu til Smáralindar í Kópavogi hefur gestum þar fjölgað um 20% eftir að ný mathöll, Garðurinn, var opnuð þar.
Forseti bæjarstjórnar hefur áhyggjur
Gunnar Már Gunnarsson, verðandi forseti bæjarstjórnar á Akureyri, hefur áhyggjur af samþjöppun á markaði verslunarhúsnæðis á Akureyri. Hann segir að tryggja þurfi fjölbreyttan verslunarrekstur í bænum og lykilþáttur í því sé heilbrigður leigumarkaður með verslunarhúsnæði og að hafa rekstrarlegt umhverfi traust:
„Árið 2024 vann Samkeppniseftirlitið markaðsgreiningu fyrir Akureyri. Gögnin eru frá 2022 en ég leyfi mér að efast um að staðan hafi breyst mikið til batnaðar síðan þá. Þrír stærstu aðilarnir áttu um 80-90% af því húsnæði sem var til leigu fyrir verslanir. Hér ríkir langt í frá næg samkeppni og það gerir frjálsan rekstur óhjákvæmilega erfiðari en hann þyrfti að vera,“ segir Gunnar Már Gunnarsson í aðsendri grein á Akureyri.net í byrjun maí.
