Vilja skriflega staðfestingu á að Ísland sé ekki umsóknarríki að ESB
Guðrún Hafsteinsdóttir, Sigmundur Davíð Gunnlaugsson og Stefán Vagn Stefánsson leggja til að ríkisstjórnin tilkynni Evrópusambandinu að engin aðildarumsókn frá Íslandi liggi fyrir. Sambærileg tillaga var áður flutt af Ingu Sæland á sex löggjafarþingum án þess að hljóta afgreiðslu.
Leiðtogar stjórnarandstöðuflokkanna á Alþingi vilja fela ríkisstjórninni að tilkynna Evrópusambandinu „með skýrum og ótvíræðum hætti“ að Ísland sé ekki umsóknarríki. Þau vilja svo að ríkisstjórnin fái skriflega staðfestingu frá Evrópusambandinu á að svo sé.
Þetta er efni stuttrar og snarprar þingsályktunartillögu Guðrúnar Hafsteinsdóttur, formanns Sjálfstæðisflokksins, Sigmundar Davíðs Gunnlaugssonar, formanns Miðflokksins, og Stefáns Vagns Stefánssonar, þingflokksformanns Framsóknar, um stöðu Íslands gagnvart ESB.
Í greinargerð tillögunar vísa þremenningarnir til þjóðaratkvæðagreiðslunnar 29. ágúst síðastliðinn um hvort hefja ætti aðildarviðræður að nýju. Þeir túlka niðurstöðuna sem vilja þjóðarinnar til þess að Ísland sé ekki heldur umsóknarríki.
„Það liggur í hlutarins eðli að ríki sem vill ekki aðildarviðræður við Evrópusambandið, og enn síður gerast aðili að því, á ekki að vera umsóknarríki um aðild að sambandinu,“ segir í greinargerðinni.
Í greinargerðinni er rifjað upp að utanríkisráðherra, í ríkisstjórn Framsóknarflokks og Sjálfstæðisflokks, hafi árið 2015 tilkynnt ESB að ríkisstjórnin hygðist ekki hefja aðildarviðræður að nýju …
