„Ég var að skila af mér forsetakeðjunni um síðustu helgi,“ segir Erna Hauksdóttir, en hún var forseti Rótarýklúbbsins Borga í Kópavogi síðasta ár. „Það er alltaf stjórnarskiptafundur á vorin og þá kemur alveg nýtt teymi,“ segir hún. Erna er ekki óvön stjórnunarstörfum en hún var um árabil framkvæmdastjóri Samtaka ferðaþjónustunnar.
Tveimur vikum áður en Erna skilaði af sér forsetakeðju síns klúbbs tók eiginmaður hennar, Júlíus Hafstein, við forsetakeðju Rótarýklúbbsins Þinghóls í Kópavogi. „Við vorum samtímis forsetar í tvær vikur hjónin,“ segir Júlíus og hlær, og það ættu að vera hæg heimatökin að fá ráð frá eiginkonunni í nýja starfinu.
Erna er búin að vera í Rótarý í 15 ár og hennar klúbbur, Borgir, er fjölmennur. „Við erum 75 talsins og það er yfirleitt alltaf jafnt af konum og körlum og öll embætti eru í höndum karla og kvenna til skiptis.“
Erna segir að Rótarýhreyfingin sé góður félagsskapur þar sem reynt er að hafa jákvæð áhrif á samfélagið og síðan sé einnig mikil fræðsla í boði fyrir félagsmenn. „Við í Borgum hittumst alla fimmtudagsmorgna og borðum saman morgunmat og þá er alltaf fyrirlesari. Þetta er gríðarlega upplýsandi og skemmtilegt og verið að fjalla um mjög ólík málefni.“
Góður félagsskapur
Erna segir að fólk í Rótarý vilji láta gott af sér leiða og það sé borgað veglega í Rótarýsjóðinn sem er á vegum alþjóðahreyfingarinnar, en sá sjóður hefur m.a. einbeitt sér að því að útrýma mænusótt í heiminum. Síðan styrkja klúbbarnir alls konar málefni og Borgir styrktu t.a.m. líknarsjóð Lindakirkju og Mæðrastyrksnefnd Kópavogs á síðasta ári.
„Svo gerum við líka margt skemmtilegt og ferðumst saman, bæði innanlands og erlendis og við erum með reit hérna fyrir utan bæinn þar sem við gróðursetjum og við erum að plokka Borgarholtið hérna árlega.“
Júlíus var að taka við sem forseti í Rótarýklúbbnum Þinghóli, sem hann segir talsvert minni klúbb en Borgir, eða rúmlega 20 manns. Hann hefur mikla reynslu af stjórnunar- og félagsstörfum, m.a. sem sendiherra og formaður HSÍ með meiru, og hefur verið í Rótarý síðustu 5-6 árin.
„Það er alltaf vel mætt hjá okkur og alltaf einhverjir gestir á fundunum sem við erum með klukkan sex á miðvikudögum og borðum þá kvöldmat saman. Við erum yfirleitt alltaf með ræðumenn, fólk úr atvinnulífinu, íþróttahreyfingunni, stjórnmálum, menningu, skólamálum og það hefur gengið mjög vel að fá fólk til okkar að ræða málin.“
Júlíus segir að það megi alveg segja að hreyfingin sé að sumu leyti mannræktarhreyfing að því leyti að fólk er alltaf að læra eitthvað nýtt á fundunum. „Það fer vel með mann að vera í þessum félagsskap.“
Fáðu þér áskrift til að lesa áfram
Þú ert innskráð(ur) sem ... en ert ekki með áskrift.
Aðgangur að þessari frétt í fullri lengd krefst áskriftar að Morgunblaðinu,
rafræns aðgangs á borð við vikupassa eða séráskriftar að viðkomandi efnisflokki
á mbl.is.
