„Það er ljómandi gott að frétta,“ segir Ása María Reginsdóttir. „Sumarið er komið og styttist í að við Emil förum út til Ítalíu, en hann er búinn að setja á laggirnar knattspyrnuakademíu þar sem hann tekur á móti ungu og efnilegu knattspyrnufólki frá Íslandi. Fram að því ætlum við að njóta íslenska veðursins enda hvergi betra að vera en á Íslandi þegar sólin hækkar á lofti. Svo erum við að byrja með pasta á Olifa La Madre-pítsu sem margir hafa verið að kalla eftir.“
Ertu spennt fyrir sumrinu og hvernig mat leitarðu í um þessar mundir?
„Já, ég er mikil sumargugga og það breytist margt hjá mér í matarvenjunum þegar sumarið gengur í garð. Á Ítalíu lærði maður að árstíðirnar stjórna hráefnunum og það hefur fylgt mér hingað heim til Íslands. Nú erum við farin að nota grillið meira á pallinum heima, íslensku tómatarnir eru komnir í búðir og farnir að lita diskana okkar í sumarlitunum.“
Það er áhugavert að heyra hvernig Ása blandar saman íslenskum og ítölskum hráefnum. „Mér finnst alltaf jafngaman þegar aspasinn mætir á svæðið á Ítalíu. Hann er eitt af mínum uppáhaldshráefnum og getur auðveldlega verið aðalrétturinn á matarborðinu. Hér heima leita ég í raun að því ferskasta í grænmetis- og ávaxtaborðunum og aðlaga það mínum uppáhalds ítölsku uppskriftum. Svo er í raun sama hvað það er sem ég er að elda; ítölsk hágæðaólífuolía er alltaf hluti af pakkanum. Hún kemur til að mynda nánast algerlega í stað hefðbundinna sósa sem við Íslendingar notum mikið með fiski og kjöti. Góð nautasteik á Ítalíu er t.a.m. borin fram með góðri ólífuolíu en annars fær kjötbragðið að njóta sín,“ segir hún.
Knattspyrnuakademían haldin við Gardavatnið
Þegar Ása fer til Ítalíu ætlar fjölskyldan að ferðast um landið. „Við ætlum að fara með vinum til Sardiníu og njóta strandlífsins þar. Svo ætlum við að fá íslenska vini í heimsókn til okkar í Verona. Svo tekur við skemmtilega fótboltaverkefnið en knattspyrnuakademían er haldin við Gardavatnið. Þar fáum við krakkarnir að njóta á milli þess sem við aðstoðum Emil við ýmis praktísk atriði.“
Áttu þér uppáhaldspastarétt sem þú værir til í að deila með okkur?
„Ég segi yfirleitt að einföldustu pastaréttirnir séu þeir bestu. Pasta al pomodoro, pasta með tómötum, er einn af hornsteinum ítalskrar matargerðar og klikkar aldrei. Við erum einmitt að setja hann á matseðil Olifa La Madre Pizza. Að sjálfsögðu notum við Rummo-pastað sem við erum að flytja inn beint frá Ítalíu, eldum það „al dente“ og berum fram með Olifa-tómatbasilsósu og ferskum Burrata-osti. Svo er þessi dásemd toppuð með parmesanosti, ólífuolíu og ferskri basilíku.“
Með heimafólk með sér í vöruþróun
Þegar Ása er spurð út í hvað sé að frétta frá veitingastaðnum þá lifnar yfir henni og auðséð að hún er ánægð með að geta lyft matarmenningu landsmanna upp með ítölsku góðgæti. „Nýi pastarétturinn er hluti af glænýjum sumarmatseðli sem er fullur af spennandi nýjungum. Þar má nefna klassíska palapítsu með ansjósum og burrata-osti, en ansjósur eru mjög vinsælar og framkalla bæði kraftmikla seltu og hið eftirsóknarverða umami-bragð. Svo eru æðislegir sumarkokteilar á seðlinum líka, t.d. fíkjuspritz og Sarti Limonada.“
Á Olifa La Madre Pizza starfa meistarakokkarnir Andrea Lorenzi og Matteo Loreni. „Þeir eru par sem við kynntumst á Ítalíu og fluttu til Íslands til að opna með okkur veitingastaðinn Olifa og voru hér í tæp tvö ár. Þegar staðurinn var búinn að ná stöðugleika og allt farið að rúlla smurt fluttu þeir aftur heim til Ítalíu en starfa enn þá með okkur í vöruþróun og eins sinna þeir innflutningshluta heildsölunnar okkar í góðu samstarfi við mig. Ein mesta gæfan í lífinu er að eiga svona trausta og góða samstarfsaðila sem deila minni sýn á matargerð og lífið sjálft.“
Íslendingar almennt mjög hrifnir af ítölskum mat
Finnst þér þeir Íslendingar sem þú hittir almennt hrifnir af ítalskri matargerð og hver er þín fyrsta minning af matseldinni frá þessum slóðum?
„Ég myndi segja að Íslendingar væru almennt mjög hrifnir af ítölskum mat og sérstaklega þeir sem komast í snertingu við þessi góðu hráefni sem við og nokkrir aðrir höfum haft ástríðu fyrir að flytja til Íslands. Þessi ítölsku hráefni smellpassa við okkar íslensku lykilhráefni og lyfta að mínu mati okkar matargerð upp og gera hana enn betri.“
