Verkfalli háseta og bátsmanna hefur verið aflýst. Þetta staðfestir Bergur Þorkelsson formaður Sjómannasambands Íslands. Ótímabundið verkfall háseta og bátsmanna í Sjómannafélagi Íslands á þremur skipum Eimskips hófst á mánudaginn en núningur laut einkum að mönnun skipa.
„Við skrifuðum undir samkomulag við Eimskip um mönnun skipanna núna um kvöldmatarleytið í kvöld þannig að það er búið að aflýsa verkfalli,“ segir Bergur.
„En kjarasamningum er ekki lokið en launaliðurinn var orðinn klár. Þetta steytaði náttúrulega bara á mönnun, um það snerist verkfallið en nú er því lokið og allir sæmilega sáttir.“
Hann segir stefnt að því að klára samninginn í næstu viku og að félagsmenn kjósi um hann í kjölfarið.
Hafa mikla trú á sjómannastéttinni
Í tilkynningu frá Eimskip segir að félagið sé ánægt með að samkomulag hafi náðst við félagið og að verkfalli sé þar með aflýst. Undirbúningur fyrir brottfarir skipa hefjist þegar í stað og gert sé ráð fyrir að öll skip félagsins verði komin á áætlun í næstu viku.
„Við erum á sama máli og Sjómannafélag Íslands og höfum mikla trú á sjómannastéttinni. Við höfum langvarandi reynslu af starfi þeirra, hæfni, dugnaði og áræðni. Það er okkur mikilvægt að halda því rótgróna sambandi áfram, vinna að framgangi stéttarinnar og lyfta henni upp,” er haft eftir Vilhelm Má Þorsteinssyni, forstjóra Eimskips, í tilkynningunni.
