Bresk stjórnvöld hyggjast verja yfir 250 milljónum punda, sem samsvarar vel yfir 40 milljörðum króna, á næstu þremur árum til að verja samfélag gyðinga þar í landi.
Féð á meðal annars að nýta til að fjölga lögreglumönnum í Englandi og Wales um 500. Stjórnvöld ætla að auka öryggisgæslu í gyðingahverfum, við skóla og bæna- og samkomuhús.
Nokkrar árásir hafa að undanförnu verið gerðar í landinu sem beinast að samfélagi gyðinga. Í mars var kveikt í fjórum sjúkrabílum sjálfboðaliðasamtaka gyðinga í London.
Viðbúnaðarstig vegna hryðjuverkaógnar í Bretlandi var hækkað eftir stunguárás sem beindist gegn gyðingum í London í apríl. Þá var árás gerð á bænahús gyðinga í Manchester í október í fyrra. Árásin var gerð á heilagasta degi gyðinga, Yom Kippur.
„Aukið gyðingahatur sem við höfum horft upp á á síðustu árum hefur reynst prófraun á gildum okkar sem þjóðar,“ segir í yfirlýsingu frá Keir Starmer, fráfarandi forsætisráðherra Bretlands. Hann segir það hafa verið eitt helsta áherslumál sitt frá fyrsta degi í embætti að stemma stigu við þessari þróun.
