Tvenn mótmæli gegn fyrirhuguðu sjókvíaeldi í Seyðisfirði hófust klukkan 15 í dag. Þau eru annars vegar haldin á Austurvelli í Reykjavík og á Seyðisfirði.
Fyrirtækið Kaldvík fékk í september leyfi fyrir tíu þúsund tonna laxeldi í Seyðisfirði.
Mótmælin eru tengd með beinni útsendingu og sameiginlegri dagskrá. Á fjórtánda þúsund hefur skrifað undir áskorun um verndun Seyðisfjarðar.
Mótmælin eru haldin í samstarfi Landverndar, Verndarsjóðs villtra laxastofna (NASF) og Vá! – Félags um vernd fjarðar ásamt breiðfylkingu náttúruverndarsamtaka.
„Að mati aðstandenda mótmælanna er Seyðisfjörður orðinn táknmynd stærri spurningar um lýðræði, náttúruvernd og almannahagsmuni á Íslandi,“ segir í tilkynningu.
„Ef þetta vígi fellur, þrátt fyrir sex ára baráttu heimamanna, eindregna andstöðu samfélagsins og þúsundir undirskrifta, vakna áleitnar spurningar um hver ráði í raun ferðinni þegar ákvarðanir eru teknar um náttúruauðlindir landsins. Hvers virði er samráð ef ekki er hlustað?“ segir þar enn fremur.
Fjallað var um málið í Kastljósi í vikunni.
