Í dag höfðu 1.854 kosið utan kjörfundar vegna sveitarstjórnarkosninganna 16. maí. Það eru nærri tvöfalt fleiri en á sama tíma árið 2022, þegar 942 höfðu kosið. Sýslumaðurinn á höfuðborgarsvæðinu safnar þessum tölum saman daglega.
Það eru tvær og hálf vika til kosninga og vinna við undirbúning stendur sem hæst. Landskjörstjórn hélt í dag fund með fulltrúum allra yfirkjörstjórna sveitarfélaga þar sem farið var yfir mikilvæg atriði við framkvæmd kosninganna, en þrír slíkir fundir verða fram að kosningum.
Listakosningar í flestum sveitarfélögum
Sextíu og eitt sveitarfélag er á landinu og listakosningar í langflestum þeirra, eða fimmtíu. Í sjö sveitarfélögum eru óbundnar kosningar, þar sem engir framboðslistar komu fram og í fjórum sveitarfélögum er sjálfkjörið. Þar birtist aðeins einn framboðslisti og því verða engar kosningar. Í langflestum sveitarfélögum helst kosningafyrirkomulag eins milli ára, en dæmi eru um breytingar. Til að mynda eru listakosningar í Árneshreppi í fyrsta sinn í sextíu og átta ár, en þar hafa ekki verið framboðslistar síðan 1958. Í Langanesbyggð eru óbundnar kosningar en þar hefur lengi verið kosið milli framboðslista.
Mikilvægt að hlusta eftir áhuga fólks á sveitarstjórnarsetu
Í Speglinum var rætt við Sigríði Jóhannesdóttur, sem situr í yfirkjörstjórn Langanesbyggðar. Hún segir það leggjast misvel í fólk að allir skuli vera í kjöri.
„Ef þú býrð í sveitarfélagi þar sem er óbundin kosning og ert orðinn átján ára skaltu vera viðbúinn því að vera kjörinn í sveitarstjórn. Þeir einir mega skorast undan sem eru ekki heilsuhraustir og hafa náð 65 ára aldri eða setið í sveitarstjórn í eitt kjörtímabil eða lengur.“
Sigríður segir rétt að hlusta eftir því hverjir hafi áhuga á því að sitja í sveitarstjórn, því það sé mikilvægt fyrir samfélagið. „Það er ekki gott að mínu mati að vera að kjósa einstaklinga sem kæra sig ekki um að sitja í sveitarstjórn. Maður er að setja þann einstakling í pínu vonda stöðu, hann kannski hefur ekki tök á því að sinna þessu vel og það er ekki gott.“
