Leiðtogar stjórnarandstöðuflokkanna eru sammála um að ríkisstjórnin þurfi að snúa sér að því að lækka vexti og verðbólgu til að skapa sátt í íslensku samfélagi.
„Nú þarf að mynda þjóðarsátt um að ná niður vöxtum og verðbólgu og verðtryggingu,“ segir Lilja Alfreðsdóttir, formaður Framsóknarflokksins, um niðurstöðu atkvæðagreiðslunnar.
Hún segir að ná þurfi þjóðinni saman um þetta. „Vegna þess að það eru að mínu mati skilaboð þjóðarinnar. Hún er ekki til í þessa vegferð og hafnar málflutningi þess efnis,“ segir hún.
Lilja segir niðurstöðuna sigur unga fólksins en „þungt högg fyrir ríkisstjórnina“.
Ísland snúi ekki baki við umheiminum
Guðrún Hafsteinsdóttir, formaður Sjálfstæðisflokksins, segir að niðurstaðan sé áfall fyrir ríkisstjórnina sem hún segir að hafi lagt allt undir í málinu.
„Nú er komin niðurstaða í þetta mál. Þá er besta leiðin til þess að græða sárin að ríkisstjórnin hlusti á niðurstöðuna og leggi þessa vegferð til hliðar,“ segir Guðrún.
Hún leggur áherslu á að með því að halda ekki til aðildarviðræðna sé Ísland ekki að snúa baki við umheiminum.
„Því við viljum vera áfram í nánu sambandi við Evrópusambandið, Evrópu og sem flest önnur ríki en þjóðin sendir skýr skilaboð um að við ætlum að stýra þeirri för sjálf.“
Þætti eðlilegt að forsætis- og utanríkisráðherra segðu af sér
Sigmundur Davíð Gunnlaugsson, formaður Miðflokksins, segir að sér þætti eðlilegt ef utanríkisráðherra og forsætisráðherra segðu af sér í ljósi niðurstöðu atkvæðagreiðslunnar en hann segist ekki eiga von á því.
Hann segir að þegar Bretar hafi valið að ganga út úr Evrópusambandinu hafi forsætisráðherrann David Cameron lagt sig undir og sagt af sér.
„Hér lögðu ráðherrar sig undir í atkvæðagreiðslu um hvort Ísland ætti að komast inn í Evrópusambandið og þeir töpuðu því. Það væri eðlilegast að mínu mati að þeir fylgdu dæmi Camerons.“
Hann segir að sameina verði þjóðina með því að ná tökum á vöxtum og verðbólgu.
„Ef ríkisstjórnin ætlar að halda áfram þá er það hlutverk hennar að reyna að ná fólki saman. Það verður ekki öðruvísi gert en með því að bregðast við þeim áhyggjum sem höfðað var til hjá þeim sem kusu já,“ segir Sigmundur Davíð.
