Alvarlegt vinnuslys varð á sveitabænum Brekkugerði 4. ágúst síðastliðin og tókst ekki að ná í Neyðarlínuna þegar kalla átti eftir hjálp. Sveitarstjórn Fljótsdalshrepp ákvað í kjölfarið að beina því til dómsmála- og innviðaráðherra að þrýsta á tafarlausar úrbætur á fjarskiptakerfinu. Þetta kemur fram í frétt Austurfréttar.
Þeir hafa einnig skorað á umhverfis- og samgöngunefnd að kalla forstjóra símafyrirtækja á sinn fund og krefja þá skýringa hvers vegna var farið gegn öllum þeim viðvörunarbjöllum sem hringdu í aðdraganda útfösunar 2G og 3G fjarskiptakerfanna.
„Mér finnst það nú bara eðlilegt að þeir sem hafa eitthvað vægi eða geti haft eitthvað um þessi mál að segja að þeir svari fyrir. Sko, dreifisvæðið hefur minnkað, það er alveg ljóst. Það verður öllum alveg ljóst sem keyra um vegi landsins og reyna að halda símasambandi á meðan, meira að segja á stöðum þar sem áður var ágætt símasamband er ekkert samband í dag,“ segir Bragi Þór Thoroddsen, sveitarstjóri Fljótsdalshrepps.
Vilja ekki telja í mannslífum þegar kemur að því hrökkva í gírinn
Þrátt fyrir að sveitarstjórnin beini orðum sínum til yfirvalda og ráðherra er tekið fram að ákvörðunin var tekin af stjórnendum símafyrirtækja landsins og telur hún þá skulda þjóðinni skýringar á því hvers vegna staða mála er eins slæm og raun ber vitni.
Sveitarstjórnin hefur engin viðbrögð fengið við bókun sinni en þeir vonast eftir að umhverfis- og samgöngunefnd verði við ósk þeirra að fá forsvarsmenn símafyrirtækjanna á opin fund.
„Væntingarnar eru þær að þetta sé skoðað af almannavörnum, lögreglu og viðbragðsaðilum. Þetta er auðvitað óviðunandi ef ekki næst í þá þjónustu, svo ég tali ekki um neyðarþjónustu. Við viljum ekki endilega að þetta sé talið í mannslífum þegar kemur að því að hrökkva í gírinn og gera eitthvað,“ segir Bragi
