Bandarískum ferðamanni var nóg boðið eftir að hann var rukkaður um 22 þúsund krónur fyrir lambakótelettur og tvo drykki á veitingastað á Íslandi. Hann varar fólk við að koma hingað og segir Íslendinga vera okrara.
Ekki sáttur
„Ekki fara til Íslands,“ segir ósáttur bandarískur ferðamaður í grúbbu á Facebook. Ástæðan er verðlagið, eða réttara sagt okrið sem hann segist hafa orðið fyrir. Til að mynda á veitingastöðum.
„Við erum búin að vera hérna í fjóra daga og allt hérna er rán,“ segir hann. „Í kvöld fórum við út að borða. Kvöldmaturinn minn var ein lambakóteletta, ein bökuð kartafla, smá grænmeti, tveir drykkir, enginn eftirréttur eða kaffi, og reikningurinn var 180 Bandaríkjadalir.“
180 dalir jafngildir rúmlega 22 þúsund krónum. Var ferðamaðurinn alls ekki sáttur við að þurfa að reiða þetta fram fyrir kvöldverðinn.
„Það eina sem Íslendingar vilja gera er að okra á túristum. Ekki versla við þá,“ segir hann að lokum.
Rándýrir leigubílar
Umræðan um verðlag á Íslandi er ekki ný af nálinni enda er Ísland eitt af dýrustu löndum heims fyrir ferðamenn. Fyrir utan hátt verðlag þá er krónan sterk sem þýðir að ferðamennirnir fá minna fyrir sinn gjaldmiðil.
Margir taka undir með honum í athugasemdum með færslunni. Það er ferðamenn sem líður eins og þeir hafi verið sviknir eftir að hafa þurft að reiða fram veskið á Íslandi.
„Tuttu mínútna leigubílaferð kostar 150 dollara. Þetta land er svindl,“ segir einn. En það jafngildir um 18.500 krónum.
Sjá einnig:
Hrun í komu ferðamanna – Marinó segir tvær leiðir í boði og önnur sé augljóslega betri
„Mjög gott ráð. Hlustið á það og farið ekki til Íslands. Ekkert ykkar. Í alvörunni. Gerið það,“ segir annar.
Bandaríkin beri sína ábyrgð
Sumir benda á að það sé ástæða fyrir þessu háa verðlagi á Íslandi. Meðal annars að Ísland sé eyja og hingað þurfi að flytja flestar neysluvörur. Þá eigi Bandaríkin talsverða sök að máli, það er vegna forseta síns Donald Trump sem valdið hefur olíukrísu í heiminum með innrásinni í Íran sem og tollastríði við Evrópu, Kína og fleiri lönd. Þá er ferðamanninum bent á að það eigi ekki að koma neinum á óvart að Ísland sé dýrt.
„Þeir eru ekki að okra á túristum þegar allir borga sama verð,“ segir ein kona. „Verðlagið er það sem það er, launin eru ábyggilega hærri líka. En ef þeir hækka verðið á ferðamannastöðum þá er það annað mál.“
„Ég hef komið til Íslands í mörg ár, maturinn hefur hækkað í hvert skipti sem við komum, sem er óheppileg afleiðing verðbólgu og hækkandi verðlags í heiminum,“ segir önnur. „En það er fullt af veitingastöðum sem selja lamb á svipuðu verði. Eins og með aðra staði er það undir þér komið að rannsaka verðlagið, þú getur spurt heimamenn. Þeir eru vingjarnlegir og láta þig vita hvar sé hægt að fá besta matinn. Sá sem skrifaði upphaflegu færsluna er illa upplýstur.“
