Sálfræðingafélag Íslands telur stöðu sálfræðiþjónustu á endurhæfingarmiðstöðinni Reykjalundi alvarlega. Missir á reynslumiklu starfsfólki og langtímaveikindi starfsfólks hafi skapað aðstæður þar sem mikið álag hvíli á þeim sem enn eru við störf.
Fella hefur þurft niður ýmsa lykilþætti í þjónustu við fólk sem leitar til Reykjalundar.
„Með uppsögnum lykilstarfsfólks hefur tapast mikil reynsla og sérhæfð þekking sem byggst hefur upp undanfarna áratugi. Þá er starfsfólk í langtímaveikindum vegna álags og óheilnæms húsnæðis,“ segir í tilkynningunni.
Meira 111 milljónir söfnuðust til styrktar endurhæfingarmiðstöðinni í landssöfnun fyrr í mánuðinum. Markmiðið var að safna 100 milljónum til að tryggja endurbætur á sjúkraþjálfunarálmu miðstöðvarinnar.
Heildarviðhaldsþörf Reykjalundar er þó talin um 2 milljarðar króna og hefur þurft að loka um 20% af húsnæði miðstöðvarinnar.
Í tilkynningu stjórnar Sálfræðingafélagsins er skorað á stjórn og framkvæmdastjórn Reykjalundar, SÍBS og heilbrigðisyfirvöld að vinna án tafar með starfsfólki og fagfélögum að skýrri aðgerðaáætlun til að stöðva frekari mannauðsflótta frá Reykjalundi og afturför þjónustu.
Tekið er fram að sálfræðilegt mat og meðferð séu lykilþættir í sérhæfðri endurhæfingu fólks með flókinn og fjölþættan vanda.
„Starfsemi Reykjalundar byggist á nánu samstarfi fagstétta þar sem fjölbreytt sérþekking fléttast saman í endurhæfingu. Þegar sálfræðiþjónustan veikist hefur það því áhrif á endurhæfinguna í heild og batahorfur skjólstæðinga,“ segir í tilkynningunni.
