Opinberaður hefur verið ráðningarsamningur Akureyrarbæjar við Berglindi Ósk Guðmundsdóttur en meirihluti nýkjörinnar bæjarstjórnar samþykkti á fundi sínum á þriðjudag að ráða hana sem bæjarstjóra en Berglind er einnig oddviti Sjálfstæðisflokksins í bæjarstjórn. Minnihlutinn hafnaði því að ráða Berglindi og gagnrýnir þau kjör sem ráðningarsamningurinn kveður á um ekki síst í ljósi reynsluleysis Berglindar. Berglind er með rétt undir tvær milljónir króna á mánuði í dagvinnulaun en heildarlaun hennar eru þó hærri en það. Bærinn útvegar nýja bæjarstjóranum einnig ýmislegt eins og til að mynda líftryggingu. Berglind segist þó fá lægri laun en forveri hennar.
Ráðningarsamningurinn var samþykktur af meirihluta bæjarstjórnar, að Berglindi undanskilinni sem vék af fundi á meðan bæjarstjórn ræddi samninginn en varabæjarfulltrúinn Arna Rut Gunnarsdóttir tók sæti hennar á fundinum.
Samkvæmt samningnum fær Berglind 1.804.114 krónur á mánuði í dagvinnulaun. Launin taka breytingum í samræmi við ákvæði um hækkun taxta í reglum um launakjör og starfsaðstæður bæjarfulltrúa og nefndarmanna hjá Akureyrarbæ. Í laununum er innifalin greiðsla fyrir nefndarstörf og setu í bæjarstjórn en ekki er greitt aukalega fyrir nefndarstörf eða setu i vinnuhópum a vegum Akureyrarbæjar.
Ofan á dagvinnulaun Berglindar bætist síðan stjórnendaálag sem nemur 45 prósent af mánaðarlaunum, en það hlutfall nemur 811.851 krónu. Segir í ráðningarsamningnum að stjórnendaálag sé þóknun fyrir unna yfirvinnu og allt áreiti utan dagvinnutíma, undirbúning, ferðatíma, mótttökur gesta og hvað annað vinnuframlag sem til falli utan dagvinnutíma. Greitt sé 13,04 prósent orlof á stjórnendaálag.
Berglind segir hins vegar í Facebook-færslu að laun hennar verði 13,5 prósent lægri en laun Ásthildar Sturludóttur forvera hennar.
Óreynd
Auk dagvinnulaunanna og stjórnendaálagsins greiðir Akureyrarbær Berglindi fyrir akstur í þágu bæjarins á hennar eigin bifreið. Greitt er samkvæmt akstursdagbók. Bærinn greiðir kostnað Berglindar vegna notkunar á farsíma sem henni er lagður til, auk fartölvu. Akureyrarbær kaupir þar að auki líf- og slysatryggingu fyrir Berglindi samkvæmt gildandi samningi bæjarins vid tryggingafélag sveitarfélagsins þar um.
Ráðningarsamningurinn gildir til 30. maí 2030 en gagnkvæmur uppsagnarfrestur er þrír mánuðir. Samkomulag er um að við starfslok í lok kjörtímabils verði laun greidd á uppsagnarfresti í þrjá mánuði og að auki þriggja mánaða biðlaun.
Minnihlutinn gagnrýndi ráðningu Berglindar sem og þau kjör sem samið var um henni til handa. Vildi minnihlutinn að bæjarstjórastaðan yrði auglýst eða að Ásthildur Sturludóttir yrði endurráðin en hún var bæjarstjóri frá 2018 og þar til um síðustu mánaðamót. Upphaflega var Ásthildur ráðin eftir að bæjarstjórastarfið var auglýst.
Minnihlutinn hafnaði ráðningarsamningnum og sagði í sameiginlegri bókun að með því að auglýsa ekki stöðu bæjarstjórans á Akureyri lausa til umsóknar væri komið í veg fyrir að faglegt hæfnismat færi fram og útilokað sé að tryggja að hæfasta manneskjan sem völ sé á veljist til starfsins. Þá skjóti það skökku við að bjóða einstaklingi með takmarkaða reynslu af sama sviði upp á samskonar launakjör og fyrrum bæjarstjóri (Ásthildur Sturludóttir, innsk DV) hafði, manneskju með umtalsvert meiri starfsreynslu. Launakjör Berglindar muni kosta bæjarsjóð um 40 milljónir króna á ársgrundvelli, upphæð sem jafngildi bróðurpartinum af árlegum kostnaði við brýn verkefni á borð við farteymi inn í grunnskóla Akureyrar.
Vill minnihlutinn því greinilega meina að Berglind hafi svipuð kjör og Ásthildur en eins og áður kom fram segir sú fyrrnefnda að hennar laun séu 13,5 prósent lægri.
Berglind
Í ljósi athugasemda minnihlutans um starfsreynslu Berglindar er ekki úr vegi að bera saman hennar reynslu við þá sem Ásthildur hafði að baki þegar hún var ráðin bæjarstjóri.
Ásthildur hafði reynslu af því að stýra sveitarfélagi áður en hún varð bæjarstjóri á Akureyri en hún var bæjarstjóri í Vesturbyggð. Þar á undan starfaði hún m.a. sem framkvæmdastjóri Sambands sveitarfélaga á Vestfjörðum.
Berglind er ekki með jafn miklar stjórnunarreynslu og Ásthildur var þegar hún var ráðin en sú fyrrnefnda er raunar um 10 árum yngri en sú síðarnefnda var þegar hún tók við sem bæjarstjóri. Berglind var Alþingismaður fyrir Sjálfstæðisflokkinn frá 2021-24 en þar áður var hún lögmaður og síðan lögfræðingur á skrifstofu rektors Háskólans á Akureyri og stjórnarformaður Fallorku. Eftir að hún lét af þingmennsku hvarf Berglind aftur til starfa hjá Háskólanum á Akureyri. Hún hafði sóst eftir að vera áfram á lista Sjálfstæðisflokksins, í Norðausturkjördæmi, í þingkosningunum 2024 en því hafnaði uppstillingarnefnd.
