Ekki eru allir á eitt sáttir með nýjan meirihluta í borgarstjórn, ef eitthvað er að marka samfélagsmiðla. Sigmundur Davíð Gunnlaugsson, formaður Miðflokksins, málar upp þá mynd að Sjálfstæðisflokkurinn hafi fengið stefnu Miðflokksins „lánaða“ og sigrað kosningarnar út á hana. „ Ég skal viðurkenna að ég er hundsvekktur yfir því að hinu sögulega tækifæri sem gafst til að breyta raunverulega um stefnu í höfuðborginni og koma í veg fyrir að hún festist í sessi sem „Rauða Reykjavík” hafi verið kastað á glæ,“ skrifar Sigmundur.
Ari Edwald, oddviti Miðflokksins í Reykjavík, skrifar á sama vettvangi að kjósendur hafi veitt Sjálfstæðisflokki og Miðflokki skýrt umboð til breytinga í borginni. „Sjálfstæðisflokkurinn kýs að hunsa það ákall kjósenda og efna til samstarfs við flokka sem bera ábyrgð á stefnunni sem var hafnað. Margir munu kalla það svik við kjósendur sem kusu breytingar,“ skrifar Ari.
Sumir gamalreyndir Sjálfstæðismenn virðast því sammála. Jón Steinar Gunnlaugsson, fyrrum Hæstaréttardómari, skrifar á Facebook að Hildur hafi „misboðið þeim kjósendum sem kusu flokk hennar og tóku þar þátt í að fella fyrri meirihluta“ og spáir því að margir muni segja sig úr Sjálfstæðisflokknum og ekki kjósa hann í næstu kosningum. Hvort það sé rétt á eftir að koma í ljós. Jón Steinar kallar Viðreisn og Framsóknarflokkinn vinstri flokka, þó að hvorugur flokkurinn gefi sig út fyrir að vera slíkur. Hátt í fimm hundruð manns líka við færslu Jóns Steinars.
Á Facebook-síðu Miðflokksins segir að mikill fjöldi nýskráninga í flokkinn hafi borist í dag. Hvort það tengist nýjum meirihluta skal ósagt látið.
Guðrún Hafsteinsdóttir formaður Sjálfstæðisflokksins segir að viðbúið sé að skiptar skoðanir séu innan flokksins. „Ég sýni því skilning,“ segir Guðrún. „Nú er það aftur á móti verkefni Hildar sem leiðir þennan meirihluta að skila verkefninu, svara því ákalli sem Reykvíkingar kölluðu eftir, það er að gera breytingar hér á stjórn borgarinnar,“ segir Guðrún. „Það eru mörg verkefni sem bíða og ég mun dæma þennan meirihluta af verkum sínum.“
Þingmenn Miðflokksins eru afar ósáttir að því er virðist við nýjan meirihluta í borgarstjórn. Þetta kom fram í umræðum um störf þingsins við upphaf þingfundar. Sögðu þeir furðulegt að í gærkvöld hafi þingmenn Sjálfstæðisflokks og Framsóknar tekið sig af mælendaskrá í síðari umræðu um þjóðaratkvæðagreiðslu um framhald ESB viðræðna. Sigmundur Davíð tengir þetta beint við meirihlutasamstarfið í borginni. „Það varð augljóst í hvað stefndi í gærkvöldi þegar þingmenn D og B tóku sig allir af mælendaskrá um ESB-mál Viðreisnar,“ segir Sigmundur.
„Ekkert spennt fyrir hægristjórn“
Vinstri menn virðast aftur á móti allt annað en kátir með nýja meirihlutann.
„Sem vinstrimanneskja þá er maður auðvitað ekkert spenntur fyrir hægristjórn,“ segir Sanna Magdalena Mörtudóttir, oddviti Vinstrisins, og vekur athygli á því að ekkert sé fjallað um húsnæðisuppbyggingu í áherslum meirihlutans. „Sem er eitt af því mikilvægasta í lífi fólks,“ skrifar Sanna á Facebook.
Pétur Marteinsson, oddviti Samfylkingarinnar í Reykjavík, hefur áhyggjur af ýmsu varðandi stefnuskrá meirihlutans, til dæmis varðandi samgöngumál og leikskólamál. Hann óskar nýjum meirihluta þó til hamingju.
Silja Sóley Birgisdóttir, oddviti Sósíalistaflokksins, segir þennan meirihluta skárri kost en ef Sjálfstæðisflokkur hefði myndað meirihluta með Miðflokki. „En ég er ekki ánægð með að sjá þessa hægri sveiflu í borginni,“ segir Silja Sóley. Hún óttast tafir á úrbótum í samgöngumálum og deilir áhyggjum Sönnu varðandi húsnæðismál. Hún segist tilbúin til að veita borgarstjórnarmeirihlutanum sterkt aðhald.
Gunnar Smári Egilsson, fyrrverandi formaður framkvæmdastjórnar Sósíalistaflokksins, spáir því réttilega að kjósendur Miðflokksins muni halda því fram að meirihluti Sjálfstæðisflokks, Viðreisnar og Framsóknarflokks sé þvert á vilja kjósenda; „Að niðurstöður kosninganna hafi verið þær að þessi 11% [sem kusu Miðflokkinn] ættu að stjórna Reykjavík,“ skrifar Gunnar Smári.
