Stöðugildum verður fækkað um 40 á Landspítala samhliða öðrum hagræðingaraðgerðum til að slá á rekstrarhalla. Landspítalinn þarf fimm milljarða til að ná endum saman. Forstjórinn vill milda niðurskurðinn eins og kostur er og bindur auk þess vonir við aukið framlag úr ríkissjóði. Áskoranirnar séu margþættar.
Á síðasta ári var kostnaður Landspítala rúmar 900 milljónir króna umfram fjárheimildir og tekjur.
Það sem af er þessu ári eru gjöld 1,5 milljarði króna umfram fjárheimildir og tekjur.
Fjárheimildir þessa árs mæta ekki rekstraráætlun spítalans og munar þar um 5 milljörðum króna.
Runólfur Pálsson, forstjóri segir Landspítalann þurfa 13,6 milljarða króna hækkun frá fyrra ári en hafi fengið 8,6. Hann kynnti starfsfólki í dag aðgerðir og lausnir sem ráðist verður í en bindur jafnframt vonir við aukið framlag frá ríkinu til að rétta reksturinn af.
Vill forðast stórfelldar uppsagnir
Þess vegna verður ráðist í hagræðingaraðgerðir af ýmsum toga.
„Við reynum að milda þær eins og kostur er. Við erum í rauninni að vinna áfram náið með heilbrigðisyfirvöldum að því að afla frekari fjárveitinga og höfum fengið vilyrði fyrir hluta af þessu.“
Meðal annars 1 milljarð króna fyrir nýju bráðamatsdeildina sem er í byggingu. Þá sé einnig hægt að spara með því að efla og auka sérnám lækna hér á landi. Stærsti liðurinn sé að það vanti 2,4 milljarða til að mæta kjarasamningsbundnum launahækkunum.
„En við erum, það er áfram samtal í gangi um það, þannig að það liggur ekki fyrir niðurstaða og ég hef miklar væntingar til þess að það verði bætt á endanum,“ segir Runólfur.
Engu að síður verður skorið niður.
„Eftir sitja svona um 1,4 milljarðar sem við lítum svo á að við verðum að bregðast við með hagræðingaraðgerðum. Rekstur spítalans er alla jafna þungur og þetta eru gríðarlega háar fjárhæðir sem um er að ræða. Með því að leggja okkur fram þá teljum við að við getum hugsanlega fundið leið til hagræðingar án þess að ráðast í stórfelldar uppsagnir.“
Hægt verður á fjölgun nýrra stöðugilda, og þeim fækkað um 40 með starfsmannaveltu. Ekki verður ráðið í ný störf og 11 stöðugildi hafa verið lögð niður.
„Flest þeirra voru í stoðþjónustunni, það voru nokkur í klínískri þjónustu en flest voru í stoðþjónustunni,“ segir Runólfur.
Aukið traust vegna framlags öflugs starfsfólks
Stöðugildum hefur fjölgað um tæp 400 á spítalanum á síðustu fjórum árum til að mæta auknu álagi og nú eru þau um 5300.
Þrátt fyrir aukið álag, ástand á bráðamóttökunni og skort á legurýmum hefur traust til spítalans vaxið milli ára skv. könnun Gallups og mælist nú 78%
Runólfur segir aukið traust fyrst og fremst starfsfólki spítalans að þakka.
„Starfsfólkið er mjög öflugt. Við erum með mjög útsjónarsamt fólk og það hefur sýnt að það hefur getað tekist á við aukin verkefni með mjög góðum árangri og ég treysti því að svo verði áfram. En auðvitað verðum við stjórnendur spítalans að gæta þess að álag sé ekki úr hófi fram og finna leiðir til þess.“
Vantar fleira starfsfólk til að sinna síauknu álagi
Áskoranir í rekstrinum hafi aukist mikið á síðustu árum. Fólk sem leggst inn vegna bráðra veikinda er með flóknari veikindi og þyngri en áður þekktist og legutími hafi lengst.
„Það gerir okkur erfiðara fyrir. Það má tengja það að verulegu leyti við að fólk verður eldra. Öldrun þjóðarinnar er hægt og bítandi að hafa áhrif á þjónustu spítalans. Þetta vissum við fyrir og höfum vitað í mörg ár.“
Framfarir í læknavísindum hafi lengt mjög líf fólks með langvinna sjúkdóma, til að mynda HIV sem upphaflega leiddi til dauða allra en sé nú langvinnur sjúkdómur. Sama sé að segja um margar tegundir krabbameina.
„Dánartíðni hefur lækkað, fólk lifir miklu lengur en er ekkert endilega laust í öllum tilvikum við sjúkdóminn. Þannig að allt þetta hefur áhrif á þjónustu spítalans í formi aukins álags og aukinna verkefna. Þetta verður vaxandi áskorun. Það er fyrirsjáanlegt að verkefnin munu aukast á komandi árum meira heldur en starfsfólkið sem við höfum yfir að ráða,“ segir Runólfur.
