Fastráðnir læknar á Sjúkrahúsinu á Akureyri voru með verktakagreiðslur fyrir svokölluð ferliverk sem námu á bilinu 33 milljónum og niður í rúmlega hálfa milljón króna árið 2024. Þetta eru verktakagreiðslur ofan á önnur laun sem eru mishá eftir starfshlutfalli. Níu læknar, eða eignarhaldsfélög þeirra og samlagsfélög í flestum tilfellum, fengu þessar verktakagreiðslur.
Þetta kemur fram í svörum frá Sjúkrahúsinu á Akureyri við beiðni fréttastofu um upplýsingar um þessar verktakagreiðslur. Heildargreiðslur sjúkrahússins til þessara lækna fyrir þessi ferliverk námu rúmlega 124 milljónum króna árið 2024 samkvæmt gögnunum.
Samningar Sjúkrahússins á Akureyri við þessa fastráðnu lækna hafa verið talsvert í umræðunni frá því síðasta haust. Þá var samningunum sagt upp á grundvelli fyrirmæla frá heilbrigðisráðuneytinu vegna þess að talið var að þeir stæðust ekki lög og væru dæmi um gerviverktöku.
Í kjölfarið óskaði fréttastofa eftir því að fá upplýsingar um verktakagreiðslur til læknanna frá sjúkrahúsinu í október. Þessari beiðni var hafnað. Fréttastofa kærði þessa synjun til úrskurðarnefndar um upplýsingamál í mars en áður en nefndin kvað upp úrskurð sinn í málinu sendi Sjúkrahúsið á Akureyri gögnin til fréttastofu.
Fjallað er um þessa ferliverkasamninga í fréttaskýringaþættinum Þetta helst í dag. Þáttinn má hlusta á hér:
Eingöngu upplýsingar um eiginmann ráðherra lágu fyrir
Samningarnir virka þannig að læknarnir vinna læknisverk í verktöku á sjúkrahúsinu og fá greitt með sams konar hætti og í stofurekstri úti í bæ. Þetta eru sérfræðilæknar í hjartalækningum sem gera rannsóknir á hjartavandamálum, meltingarlæknar sem gera maga- og ristilspeglanir og fleiri sérfræðingar.
Læknarnir greiða sérstök aðstöðugjöld til sjúkrahússins vegna þessa. Til að nefna dæmi um þessi aðstöðugjöld þá fékk eitt samlagsfélag eins læknis samtals rúmlega 53 milljónir samtals fyrir ferliverk á sjúkrahúsinu árið 2024 og greiddi hann rúmar 20 milljónir til spítalans í aðstöðugjöld af þessari upphæð en hélt eftir tæplega 33 milljónum króna.
Hæstu verktakagreiðslurnar voru til þessa félags og svo annars læknis sem fékk rúmar 28 milljónir króna auk aðstöðugjalda sem runnu til spítalans.
Þegar samningunum var sagt upp komu upp harðar deilur á sjúkrahúsinu vegna þessa og mótmæltu læknar á sjúkrahúsinu því og var ákveðið að fresta því að fella samningana niður þar til nú í haust. Samningarnir eru því enn í gildi.
Eftir að fréttastofa óskaði eftir upplýsingum um verktakagreiðslur til eiginmanns Ölmu Möller heilbrigðisráðherra, Torfa Jónassonar, beint frá Ölmu sendi hún þessar upplýsingar. Því var búið að greina frá því hversu háar verktakagreiðslur Torfi fékk.
Samkvæmt gögnunum frá Sjúkrahúsinu á Akureyri fékk samlagsfélag Torfa rúmlega 18 milljónir króna fyrir ferliverk á sjúkrahúsinu árið 2024.
Greiðslur til annarra lækna fyrir ferliverkin lágu hins vegar ekki fyrir fyrr en núna.
Guðjón Hauksson, nýr forstjóri Sjúkrahússins á Akureyri sem tók við í byrjun vikunnar, segir að það sé ekki tímabært að hann tjái sig um ferliverkasamningana að svo stöddu. Hann segist þurfa að setja sig inn í málið.
Í svari sem barst frá fyrirrennara hans í starfi, Erlu Björnsdóttur, á föstudaginn í síðustu sagði hins vegar að sjúkrahúsið vildi leita allra leiða til að halda læknisþjónustunni innan spítalans. Orðrétt segir í svarinu:
„Framkvæmdastjórn SAk og sérfræðilæknar við sjúkrahúsið vilja koma því á framfæri að aðilar gengu til samninga með það að leiðarljósi að tryggja öfluga heilbrigðisþjónustu og hafa ávallt lagt sig fram um að sinna störfum sínum af heilindum, þá voru samningarnir metnir bæði löglegir og hagfelldir fyrir íbúa á Norður- og Austurlandi.
Þá ber að taka sérstaklega fram að SAk hefur tryggt sérfræðilæknum sem sinna verktöku aðstöðu og fyrir það hafa þeir greitt aðstöðugjald, auk endurgjalds vegna tíma sem fer í ferliverkin/verktöku. Með þessum hætti hefur verið hægt að veita öfluga þjónustu á sama stað. Þekking og reynsla helst innan SAk og nýta má þá miklu samlegð sem er með rekstri sjúkrahússins og móttöku sérfræðinga.
Starfshópur lækna á SAk hefur unnið að tillögum sem lúta að því að tryggja sérfræðiþjónustu á SAk. Þrátt fyrir að hluti starfseminnar hafi nú þegar flust til sjálfstæðra læknastofa á svæðinu og haldist þannig að mestu í heimabyggð teljum við heppilegra að starfsemin hefði haldist innan sjúkrahússins.
Við bindum enn vonir við að fundnar verði lausnir sem gera það að verkum að það verði hægt að halda þessari mikilvægu þjónustu innan SAk. “
Þingmaður hefur áhyggjur af stöðunni
Sá þingmaður sem mest hefur tjáð sig um þetta mál er Ingibjörg Isaksen, þingmaður Framsóknarflokksins í Norðausturkjördæmi. Veit Ingibjörg hvað á að gera þegar ferliverkasamningarnir hætta að gilda á Akureyri þann 1. september?
Ingibjörg segir að hún hafi áhyggjur af stöðunni sem komin er upp á sjúkrahúsinu vegna ferliverkasamninganna. Hún segir að finna þurfi lausn á vandamálinu áður en samningarnir hætta að gilda. „Mér er umhugað um heilbrigðisþjónustu á landsbyggðinni. Ég heyri áhyggjur stjôrnenda og starfsfólks á sjúkrahúsinu yfir stöðunni og ljôst að ef ekki verður horfið frá þessari ákvörðun eða önnur lausn fundin mun þetta hafa veruleg áhrif á sjúkrahúsið og þá þjônustu sem það getur veitt. “
