Sólveig Anna Jónsdóttir, formaður Eflingar, var gestur Frosta Logasonar í Spjallinu með Frosta Logasyni. Þar ræddu þau komandi þjóðaratkvæðagreiðslu um áframhaldandi aðildarviðræður Íslands við Evrópusambandið. Í viðtalinu fer Sólveig Anna yfir ástæður þess að hún telur að Ísland eigi að hafna áframhaldandi viðræðum og ræðir meðal annars efnahagsmál, fullveldi, öryggismál og stöðu verkafólks.
Hún gagnrýnir einnig ríkisstjórnina og skamman fyrirvara þjóðaratkvæðagreiðslunnar og tjáir sig um ummæli Þorgerðar Katrínar Gunnarsdóttur utanríkisráðherra um andstæðinga aðildar Íslands að Evrópusambandinu.
Var mjög hissa á ummælum utanríkisráðherra
Sólveig Anna segist hafa verið mjög hissa á því að utanríkisráðherra Íslands hafi í viðtali við The Guardian lýst íslenskum andstæðingum áframhaldandi aðildarviðræðna við Evrópusambandið með þeim hætti sem hún gerði.
„Mér fannst til dæmis mjög skrítið að utanríkisráðherra Íslands væri í viðtali í The Guardian að kalla íslenska nei-sinna Farage-ista og hérna einhverja svona Brexit og hérna að vera að klína því upp á bara komplett alla sem eru – mér fannst það mjög skrítið, ég var mjög hissa,“ segir Sólveig Anna.
Segir ráðherrann vinna fyrir alla landsmenn
Hún segir að utanríkisráðherra gegni embætti sem þjóni öllum landsmönnum, óháð pólitískum skoðunum þeirra eða því hvort þeir hafi kosið hana.
„Við erum samborgarar hennar og hún er utanríkisráðherra í lýðræðisríki. Hún vinnur fyrir okkur öll, þó við höfum ekki kosið hana, og mér finnst það algjörlega óviðeigandi að utanríkisráðherra í lýðræðislegu landi geti verið í öðru landi að tala niður samborgara sem eru með ólíkar skoðanir með þessum grófa hætti.“
Segir ummælin vera aðdróttanir að heiðri sínum
Sólveig Anna segir ummælin fela í sér aðdróttanir að heiðri þeirra sem eru ósammála ráðherranum í málinu.
„Þetta eru bara aðdróttanir að heiðri mínum og því af hverju ég hef þessar skoðanir, að vera einhvern veginn að reyna að klína þessum manni á mig. Mér finnst hún hafa farið fram með mjög skrýtnum og óviðeigandi hætti.“
Viðtalið við Sólveigu Önnu má sjá í heild sinni á Brotkast.is.
