Árásarmaðurinn notaði riffil þegar hann hóf skothríð í átt að lögreglu og óbreyttum borgurum fyrr í dag, samkvæmt upplýsingum lögreglu. Hann segir gerandann hafa verið skotinn í hálsinn og að hann sé alvarlega særður.
Lögreglumaðurinn sem særðist í árásinni var skotinn í fótinn. Danø segir ástand hans stöðugt og að hann gangist undir aðgerð á fætinum.
Þá hefur lögreglan fengið tilkynningar um að skot árásarmannsins hafi beinst að nokkrum einstaklingum sem voru á svæðinu.
„Það gætu því verið einstaklingar sem við höfum ekki náð í og þurfa á hjálp að halda,“ segir Danø. Annars sé „margt í gangi og óleyst“.
Lögreglufulltrúinn Danø segir rannsókn málsins mjög umfangsmikla. Stórt lið lögreglu er enn á staðnum og gert er ráð fyrir að svæðið verði girt af langt fram á kvöld.
„Ástæðan að baki árásinni er enn á huldu,“ segir hann.
„En þetta er einangrað atvik og það er ekkert sem bendir til þess að almennir borgarar séu í hættu.“
Blaðamannafundurinn er hafinn. Hann er sýndur í beinu streymi á vef danska ríkisútvarpsins.
Lögreglufulltrúinn Claus Danø byrjar á því að ávarpa fundinn. Hann segir lögregluna einungis geta veitt takmarkaðar upplýsingar um málið að svo stöddu.
Hann segir árásarmanninn hafa hafið skothríð í átt að lögreglu þegar hún mætti á staðinn. Lögregla hafi svarað skotunum með þeim afleiðingum að gerandinn særðist.
Stuttu síðar, þegar skothríðinni var lokið og lögregla byrjaði að girða svæðið af, fannst almennur borgari sem skotinn hafði verið af árásarmanninum. Hann lést af sárum sínum í dag.
Lögregla vildi ekki segja til um hvort tengsl væru á milli árásarmannsins og hins látna.
Danska lögreglan hefur boðað til blaðamannafundar í kvöld vegna árásarinnar. Fundurinn verður klukkan 18 á dönskum tíma, eða klukkan 16 á íslenskum tíma.
Claus Danø lögreglufulltrúi segir að verið sé að rannsaka sérstaklega hvernig almennur borgari varð fyrir skoti á meðan á skothríðinni stóð.
Lögregla telur einstaklinginn ekki hafa orðið fyrir skoti lögreglumanns, heldur hafi gerandinn skotið hann til bana.
Danska lögreglan veit ekki hvaða ástæður liggja að baki árásinni í dag. Hún hefur þó gefið það upp að einstaklingurinn sem grunaður er um árásina er karlmaður.
Fjölmennt lið lögreglunnar á Norður-Jótlandi er enn starfandi á vettvangi.
„Við verðum að rannsaka alla atburðarásina. Við vitum því enn ekki nákvæmar ástæður árásarinnar og hvað liggur henni að baki,“ er haft eftir Claus Danø, lögreglufulltrúa hjá lögreglunni á Norður-Jótlandi, í umfjöllun DR.
Einn almennur borgari lést í árásinni að því er fram kemur í frétt DR.
Maðurinn sem grunaður er um verknaðinn er alvarlega slasaður og liggur á sjúkrahúsi.
Ástand lögreglumannsins sem slasaðist er stöðugt.
Ýmislegt er enn á reiki hvað skotárásina varðar.
Takmarkaðar upplýsingar liggja fyrir um líðan þeirra sem særðust, þar á meðal árásarmannsins. Samkvæmt lögreglu eru áverkar þeirra alvarlegir.
Óljóst er hvers vegna skotið var á lögregluna og hver ástæðan að baki árásinni var. Þar að auki hefur ekki komið fram hver grunaður gerandi er né hvort fleiri hafi verið handteknir.
Í tilkynningu lögreglunnar á Norður-Jótlandi segir að á svæðinu sé mikill reykur og hafi lögregla upphaflega verið kölluð til vegna reyksins.
Fjölmennt lið lögreglu, slökkviliðs og sjúkraliða er á vettvangi. Sérsveit hefur einnig verið kölluð til.
Þá hafa borgarar verið beðnir um að halda sig fjarri á meðan aðgerðir standa yfir.
Samkvæmt fyrirtækjum á svæðinu heyrðust skothljóð nærri Virkelyst 12 Nørresundby norðan við Álaborg upp úr hádegi í dag.
Lögregla var kölluð til og hóf umfangsmikla rannsókn og björgunaraðgerðir, að því er fram kemur í tilkynningu.
Árásarmaðurinn hóf skothríð þegar lögreglu bar að garði. Lögregla svaraði með skotum og varð gerandi fyrir skoti. Að auki var lögreglumaður skotinn og einn almennur borgari.
