Skólar á Norður-Írlandi voru rýmdir í morgun eftir að þeim bárust sprengjuhótanir í tölvupósti. Foreldrar voru beðnir að sækja börnin sín þegar í stað og samkvæmt nýjustu upplýsingum lögreglu hafa allt að 300 skólar tilkynnt um að hafa fengið sama hótunarpóstinn.
Paul Givan, menntamálaráðherra Norður-Írlands, segir að í póstinum hafi verið fullyrt að sprengjur væru í skólunum og hótað að sjaríalögum yrði komið á í landinu. Skilaboðunum hafi lokið á orðunum „Allahu Akbar“.
Foreldrar beðnir að koma strax
St Colman’s grunnskólinn í Lisburn var meðal þeirra skóla sem voru rýmdir. Foreldrar fengu fyrirmæli um að koma tafarlaust og sækja börnin.
„Ekki örvænta, börnin eru öll örugg,“ sagði í skilaboðum skólans til foreldra.
Skólinn greindi jafnframt frá því að rýmingin hefði gengið rólega fyrir sig og að starfsfólk hefði umsjón með börnunum.
Ráðherra telur íslamista að baki
Givan sagði við fjölmiðla í morgun að honum virtust íslamistar standa að hótununum. Hann nefndi þá sérstaklega orðin um sjaríalög og lokakveðjuna í póstinum.
Ráðherrann sagði upphaflega að 160 skólum hefðu borist skilaboðin. Síðar tilkynnti lögreglan að allt að 300 skólar hefðu haft samband vegna sama póstsins.
Mat Givans á því hverjir standi að baki hótununum hefur ekki verið staðfest af lögreglu.
Lögreglan telur hótunina gabb
Lögreglan á Norður-Írlandi segir að pósturinn hafi verið sendur erlendis frá og að ekkert grunsamlegt hafi fundist við athuganir hingað til. Hún telur hótunina gabb og metur hættu fyrir almenning litla.
Givan sagði að skólum hefði verið ráðlagt að hafa samband við lögreglu á sínu svæði. Pósturinn einn og sér ætti ekki að kalla á lokun nema grunsamlegur hlutur fyndist í skólanum. Hann fordæmdi röskunina sem hótanirnar hefðu valdið á skólastarfi.
Skólum í Skotlandi bárust einnig hótanir. Skoska lögreglan rannsakar þær sem gabb og aðstoðaði jafnframt lögregluna á Norður-Írlandi vegna fjölda símtala sem bárust í morgun.
