Héraðssaksóknari hefur ákært sjúkraþjálfara fyrir fjársvik. Er hann sakaður um að hafa svikið nærri 4 milljónir króna út úr Sjúkratryggingum Íslands.
Sjúkraþjálfarinn er íslenskur karlmaður á fertugsaldri og starfar á höfuðborgarsvæðinu. Sakamál hefður verið höfðað gegn honum í Héraðsdómi Reykjavíkur fyrir fjársvik.
Er sjúkraþjálfarinn sakaður um að hafa blekkt starfsfólk Sjúkratrygginga Íslands í samtals 577 skipti til þess að samþykkja kröfur um greiðsluþátttöku stofnunarinnar. Heildarupphæðin nemur 3.799.472 krónum.
Tjáði hann Sjúkratryggingum að um væri að ræða kostnað sem stofnuninni bæri að greiða samkvæmt rammasamningi við sjúkraþjálfara sem hafa fengið samþykki til að starfa samkvæmt honum. Það er vegna meðferða sem hann veitti skjólstæðingum sínum á tímabilinu 22. mars til 26. september árið 2023.
Rukkaði fyrir meðferðir sem fóru ekki fram
Segir í ákæruskjalinu frá 9. apríl síðastliðnum að sjúkraþjálfarinn hafi gert þetta með því að rangfæra ýmsar upplýsingar á kröfunum sem vörðuðu gjaldaliði og/eða dagsetningar meðferðanna. En einnig hafi hann gert kröfur um greiðsluþátttöku í meðferðum sem fóru alls ekki fram. Hafi þessar blekkingar leitt til þess að Sjúkratryggingar Íslands hafi ofgreitt inn á bankareikning hans áðurnefnda peningaupphæð.
Allt að 6 ára fangelsi
Krefst héraðssaksóknari þess að sjúkraþjálfarinn verði dæmdur til refsingar fyrir þessi brot og greiðslu alls sakarkostnaðar sem hlýst af málinu.
Vísað er til 248. greinar almennra hegningarlaga. Þar segir:
„Ef maður kemur öðrum manni til að hafast eitthvað að eða láta eitthvað ógert með því á ólögmætan hátt að vekja, styrkja eða hagnýta sér ranga eða óljósa hugmynd hans um einhver atvik, og hefur þannig fé af honum eða öðrum, þá varðar það fangelsi allt að 6 árum.“
