Eftir hvítasunnuhelgina fá margir löngun til að taka sig aðeins á, reima á sig íþróttaskóna og næra líkamann með góðum mat. Það þarf þó alls ekki að vera flókið að borða hollt og vel, enda má finna ótal girnilegar og næringarríkar uppskriftir sem gera það bæði auðvelt og skemmtilegt.
Á Matur á mbl.is leynist aragrúi af hollum réttum fyrir alla daga vikunnar og hér höfum við tekið saman vikumatseðil sem hjálpar þér að koma þér af stað með bragðgóðum mat sem lætur þig glóa innan frá.
Mánudagur - Ferskt salat
Vikan byrjar á fersku og fallegu salati sem er bæði létt og næringarríkt. Í þessu ljúffenga salati fær hver einasta bragðtegund að njóta sín; sæt pera, sölt parmaskinka, mjúkur brie-ostur og safarík brómber mynda einstaklega gott jafnvægi sem gleður bæði auga og maga. Með salatinu ætlum við að gera okkur óáfengan Pina Colada.
Þriðjudagur - Kjúklingasúpa
Á þriðjudegi er tilvalið að elda eitthvað fljótlegt, heilsusamlegt og hlýlegt. Þessi dásamlega kjúklinganúðlusúpa er innblásin af taílenskri matargerð og bragðast af kókos og karríi. Hún er bæði nærandi, litríkur og fallegur réttur sem slær jafnan í gegn hjá öllum fjölskyldumeðlimum.
Miðvikudagur - Þorskur
Þegar miðvika nálgast er gott að setja fisk á borðið. Þorskur er bæði léttur og góður matur sem fer vel í maga, og þessi réttur er sannkölluð veisla án þess að vera of þungur. Hér fær fiskurinn að njóta sín í allri sinni einföldu dýrð og útkoman er einstaklega fáguð og bragðgóð.
Fimmtudagur - Grænmetislasagna
Á fimmtudegi er tilvalið að hafa eitthvað saðsamt og hollt sem yljar vel. Þetta grænmetislasagna er svo ljúffengt að það gleymist hreinlega að hér er um grænmetisrétt að ræða. Það hentar öllum aldurshópum, er bragðmikið og ekki skemmir fyrir að það er jafnvel enn betra daginn eftir. Eftir matinn ætlum við að fá okkur grænt ofurboost sem líkist sítrónukrapi.
Föstudagur - Súrdeigspítsa
Þegar föstudagurinn rennur upp er vel við hæfi að gera sér dagamun með heimagerðri súrdeigspítsu. Góð súrdeigspítsa getur verið bæði holl og einstaklega bragðgóð, sérstaklega þegar deigið fær að njóta sín almennilega. Hér er fullkomin leið til að hefja helgina á notalegum og girnilegum nótum.
Laugardagur - Hollustusalat og hráfæðissúkkulaðikaka
Á laugardegi er tilvalið að njóta matar sem sameinar hollustu og sælutilfinningu. Hollustusalat með reyktum laxi og avókadó er saðsamt, ferskt og fullt af góðri næringu. Í eftirrétt er svo ljúffengt að bera fram hráfæðissúkkulaðiköku sem setur smá hátíðarbrag á daginn, án þess að fara of langt út af sporinu.
Sunnudagur - Lambaskankar og fíkjukúlur
Sunnudagurinn kallar á mat sem má fá aðeins meiri tíma og umhyggju í eldhúsinu. Þessir lambaskankar eru einfaldir í gerð en afar bragðgóðir og henta vel þegar notaleg stemning fær að ríkja við matarborðið. Til að enda vikuna á ljúfum nótum er svo upplagt að bjóða upp á bragðgóðar fíkjukúlur með súkkulaði.
