Sigmundur Davíð Gunnlaugsson, formaður Miðflokksins, segist vera hundsvekktur vegna nýs meirihluta í borginni. Hér hafi verið tækifæri til að breyta raunverulega um stefnu í höfuðborginni en því hafi verið kastað fyrir glæ.
Eins og fram hefur komið hafa Sjálfstæðisflokkurinn, Viðreisn og Framsókn myndað meirihluta í borginni og hefur það valdið mörgum gífurlegum vonbrigðum enda hefði Sjálfstæðisflokkurinn getað myndað tveggja flokka meirihluta með Miðflokknum. Sigmundur telur að Sjálfstæðisflokkurinn hafi náð góðu kjöri í borginni með því að fá stefnu Miðflokksins lánaða en síðan hafi flokkurinn heldur hallað sér til vinstri.
Sigmundur skrifar á Facebook:
„Þegar vinstrimenn komast í meirihluta (oftast með aðstoð nytsamra sakleysingja) leggja þeir stjórnkerfið og stofnanirnar undir sig, ráðast í hreinsanir, raða inn sínu fólki og framkvæma allar furðulegustu hugmyndir sínar, líka þær sem þeir þorðu ekki að segja frá fyrir kosningar.
Þegar Sjálfstæðisflokkurinn fær skýra stefnu lánaða, sigrar út á hana og fær sögulegt tækifæri á meirihluta með þeim sem hönnuðu stefnuna fara þeir að tala um
…breiðari skírskotun!
Ég skal viðurkenna að ég er hundsvekktur yfir því að hinu sögulega tækifæri sem gafst til að breyta raunverulega um stefnu í höfuðborginni og koma í veg fyrir að hún festist í sessi sem „Rauða Reykjavík” hafi verið kastað á glæ.“
Formaðurinn segir þó rétt að fylgja þeim sið að óska sigurvegurunum til hamingju og það gerir hann, nema í stað þess að þakka oddvitum flokkanna sem mynda meirihlutann þakkar hann þeim aðilum sem hann telur að hafi raunverulega sigrað í borginni:
„Ég óska Viðreisn, Friðjóni Friðjónssyni, Degi B. Eggertssyni, Gísla Marteini Baldurssyni, utanríkisráðherra, Ríkisútvarpinu, Kaffihúsi Vesturbæjar og hinum ört stækkandi hópi starfsmanna Borgarlínuverkefnisins til hamingju með afrakstur kosninganna í Reykjavík.“
